ЛЯОНИН МУЖААС БҮХ ТӨРЛИЙН ЦАС ЦЭВЭРЛЭХ МАШИН НИЙЛҮҮЛЭХ БОЛОМЖТОЙ.
МҮХАҮТ-ын дэд захирал Ц.Магнайбаатар Ляонин мужийн Жан Вэй Дунгаар ахлуулсан бизнес бүрэлдэхүүнийг /2024.09.20/ хүлээн авч уулзлаа.
Төлөөлөгчид Монгол улстай уул уурхай, дэд бүтэц, барилгын материал, хөдөө аж ахуйн бүтээгдэхүүн, тээвэр логистикийн чиглэлээр хамтын ажиллагааны боломжийн талаар мэдээлэл солилцов. Тодруулбал Ляонин мужийн хамгийн хойд хэсэгт орших ТиеЛинг хот нь аж үйлдвэрлэл ихээр хөгжсөн ба бүх төрлийн овор хэмжээтэй цас цэвэрлэх машин, харин Даньдун болон ЧаоЯнг хотоос барилгын материал, цемент, далай бүтээгдэхүүнийг Монгол улсад нийлүүлэх сонирхолтой байгаагаа илэрхийллээ.
Харин дэд захирал Ц.Магнайбаатар хамтын ажиллагааг илүү бодит болгох үүднээс хоёр талын экспорт импортын бараа бүтээгдэхүүний жагсаалтыг гаргаж, харилцан солилцох замаар хамтын ажиллагааг эрчимжүүлэх нь чухал гэдгийг онцлов.
Дашрамд дурдахад өнөөдөр өглөө “Ляонин мужийн бараа бүтээгдэхүүний үзэсгэлэн” худалдаа Улаанбаатар хотод нээлтээ хийсэн ба БНХАУ-ын 70 орчим бизнес эрхлэгчид бүтээгдэхүүнээ танилцуулж байна. Үзэсгэлэнгийн нээлтийн арга хэмжээнд МҮХАҮТ-ын дэд захирал Ц.Магнайбаатар амжилт хүсэж үг хэллээ. Мишээл экспо төвд гурван өдөр үргэлжлэх уг үзэсгэлэн олон нийтэд нээлттэй бөгөөд эрүүл мэндийн тоног төхөөрөмж, автомашин, сэлбэг хэрэгсэл, цахилгаан дугуй, ноолуур болон нэхмэл бүтээгдэхүүн, гэр ахуйн цахилгаан бараа, ахуйн хэрэглээний цэвэрлэгээний бүтээгдэхүүн худалдаалж байна.