“Улаанбаатар түншлэл-2024” олон улсын үзэсгэлэнг амжилттай нээж, олны хөл ихтэй байна
Монголын Үндэсний Худалдаа Аж Үйлдвэрийн Танхимаас зохион байгуулж буй 49 дэх удаагийн “Улаанбаатар Түншлэл- 2024” олон улсын үзэсгэлэн яармаг өнөөдөр /2024.09.26/ эхэллээ.
Улаанбаатар түншлэл нь олон улсын түвшинд танигдсан, дотоодын хэрэглэгчид, үйлдвэрлэгчдийн хүлээдэг намрын хамгийн том үзэсгэлэн, арга хэмжээ билээ. Энэ жилийн үзэсгэлэнд дотоодын аж ахуй нэгжүүдээс гадна Бүгд Найрамдах Хятад Ард Улс, Бүгд Найрамдах Беларус Улс, Тайвань, БНСУ, Оросын Холбооны Улсын бизнес эрхлэгчид шинэ зах зээл нээн, түншийн харилцаагаа өргөжүүлэх зорилгоор оролцож байна.
Тэд мах махан бүтээгдэхүүн, гурилан бүтээгдэхүүн, шингэн хүнс, органик хүнс, жимс жимсгэнэ, хөлдөөсөн хүнс, нарийн ногоо, арьс ширэн бүтээгдэхүүн, ноос ноолуур, бэлэг дурсгал, үнэт эдлэл, бичиг хэрэг, инноваци шингэсэн тоног төхөөрөмж, хивс, гэр ахуйн тавилга, жижиг хэрэглэлүүд, банк санхүү, холбоо харилцаа гэх мэт олон салбарын бүтээгдэхүүнүүд дэлгэжээ.
Үзэсгэлэнгийн нээлтэд МҮХАҮТ-ын дэд захирал Ц.Магнайбаатар, МҮХАҮТ-ын Ерөнхий нарийн бичгийн дарга С.Баясгалан, ОХУ-ын худалдааны төлөөлөгчийн газрын тэргүүн Васильев Максим Викторович, үзэсгэлэнгийн ивээн тэтгэгч “Есөн шижир” ББСБ-ын салбарын удирдлагын газрын захирал Б.Энхзориг нарын албаны хүмүүс оролцож, үг хэллээ.
МОНГОЛ УЛС 2024 ОНЫ ЭХНИЙ ЗУРГААН САРЫН БАЙДЛААР 148 УЛСТАЙ ХУДАЛДАА ХИЙЖ, НИЙТ БАРАА ЭРГЭЛТ 13.3 ТЭРБУМ ДОЛЛАРТ ХҮРЧЭЭ
МҮХАҮТ-ын дэд захирал Ц.Магнайбаатар хэлэхдээ “Энэ удаагийн үзэсгэлэнд дотоод гадаадын нийт 100 гаруй байгууллага тэр дундаа БНХАУ, ОХУ, Бүгд найрамдах Беларусь улс, Солонгос, БНХАУ-ын Тайван зэрэг олон улсын 50 гаруй бизнес эрхлэгчид Монгол Улсын зах зээлтэй танилцах, хамтын ажиллагааг эхлүүлэхээр хүрэлцэн ирээд байна.
Монгол Улсын худалдааны эргэлт статистик мэдээллийг авч үзвэл 2024 оны эхний 6 сарын байдлаар нийт 148 улстай худалдаа хийж, нийт бараа эргэлт 13.3 тэрбум ам.долларт хүрчээ. Үүнээс экспорт 7.9 тэрбум ам.доллар, импорт 5.4 тэрбум ам.долларт хүрсэн байна. Нийт экспортын 93.3 хувийг уул уурхай, 4.7 хувийг хөдөө аж ахуй болон хөнгөн аж үйлдвэрийн бараа бүтээгдэхүүн бүрдүүлж байна.
МҮХАҮТ-ын зүгээс бизнесийн түншлэл, хамтын ажиллагааг өргөжүүлэх, гадаад дотоод худалдааг нэмэгдүүлэх, уул уурхайн бус экспортыг нэмэгдүүлэх, нэр төрлийг олшруулах хүрээнд онцгой анхааран ажиллаж, 2024 он гарснаас хойш нийт 50 гаруй гадаад, дотоод бизнес уулзалт, үзэсгэлэн худалдааг зохион байгуулсан байна.
“Улаанбаатар түншлэл 2024” олон улсын үзэсгэлэн дээрх зорилтыг хэрэгжүүлэхэд онцгой хувь нэмэр оруулж бизнесийн олон талт хамтын ажиллагааг өргөжүүлнэ гэдэгт бид итгэлтэй байна. “Улаанбаатар Түншлэл 2024” олон улсын үзэсгэлэнд оролцогч байгууллагууд болон үзэсгэлэнг зорин ирэх ААН хоорондоо гэрээ хэлцэл хийж хамтын ажиллагаагаа улам өргөжүүлэх болтугай” гэлээ.
Үзэсгэлэн 2024 оны есдүгээр сарын 26-29-ний өдрүүдэд Мишээл Экспо төвд гурван өдөр үргэлжлэх юм. Та бүхэн Мишээл экспог зорьж очвол олон сонирхолтой бараа бүтээгдэхүүнтэй танилцаж, шинэ түншлэгчээ ч олох боломжтой.
