• MN
  • EN
  • CN
  • RU
  • ЗУНЫ АМРАЛТААР ХЭРЭГЖИХ “АЖИЛТАЙ ОЮУТАН” ХӨТӨЛБӨР ЭХЭЛЛЭЭ
    06/24/2019

    Монгол Улсын Ерөнхийлөгчийн Тамгын газар, МҮХАҮТ хамтран оюутан залуусын цагийн хөдөлмөрийг дэмжих, хөдөлмөрийн харилцаанд сургах, ААН-үүдтэй холбох, ажлын байранд зуучлах, мэргэжлийн чиг баримжаа олгох зорилгоор “Ажилтай оюутан” анхдугаар хуралдааныг өнөөдөр зохион байгууллаа.  Арга хэмжээнд 200 гаруй оюутан, 30 орчим ААН оролцлоо.  

    Оюутны хөдөлмөр эрхлэлтийн талаар БСШУЯ-аас хийсэн судалгааны дүнгээс үзэхэд 15 мянган оюутан, суралцагчдын 70 хувь буюу 10 оюутан тутмын 7 нь цагийн ажил, хөдөлмөр эрхлэх сонирхол, хэрэгцээтэйгээ илэрхийлсэн байна.

    Оюутнууд их, дээд сургуулийн төлбөртөө нэмэр болох, амьжиргааны зардал буюу ном сурах бичгээ авах болон ирээдүйн хуримтлал хийх зорилгоор хөдөлмөр эрхлэх сонирхолтой байдаг аж. Гэтэл манайд оюутны цагийн болон зуны амралтаар ажил хийх эрх зүйн орчин дутмаг, оюутны цалингийн үнэлэмж муу, мэргэжлийн чиглэлээр нь ажиллуулдаггүй, ажлын хөлсийг нь дутуу өгөх, зарим нөхцөлд огт өгөхгүй тохиолдол байсаар буй.

    “Ажилтай оюутан” анхдугаар хуралдаанд “Ноосон зангилаа” дундын хоршоо, “Петровис”, “БСБ сервис” ХХК, “Номин холдинг” ХХК, “Магнай трейд” ХХК, “Эрдэнэзоо транс” ХХК зэрэг томоохон ААН, компанийн 20 гаруй төлөөлөл оролцож, оюутан залууст ажлын байрны талаар дэлгэрэнгүй мэдээлэл өглөө.

    МҮХАҮТ-аас танхимын гишүүн аж ахуйн нэгж байгууллагуудыг “Ажилтай оюутан” хөтөлбөрт идэвхтэй оролцохыг уриалаад байгаа бөгөөд өнөөдрийн арга хэмжээнд оролцсон 15 компани энэхүү хөтөлбөрийг хэрэгжүүлэхээ мэдэгдлээ.

    Оюутнууд есдүгээр сар хүртэл бүтэн цагаар ажиллах боломжтой бөгөөд  хичээлээ эхлэхээр цагаар ажиллах  юм.  "Ажилтай оюутан хөтөлбөр"-т өнөөдрийн байдлаар 400 гаруй оюутан  бүртгүүлжээ.  

    Хуралдааны үеэр МУ-ын Ерөнхийлөгчийн Оюутны хөгжлийн асуудал хариуцсан орон тооны бус зөвлөх Н.Лхагвадорж хэлэхдээ, “Монгол Улсын Ерөнхийлөгч оюутны хөгжил, хичээлийн бус цагаар хөдөлмөр эрхлэх боломж бүрдүүлэхэд түлхүү анхаарч байгаа юм. Үүний нэг илрэл нь өнөөдрийн “Ажилтай оюутан” хөтөлбөрийн хүрээнд хийгдэж буй ААН-үүд, оюутнуудын нэгдсэн уулзалт болж байна. Өнгөрсөн хугацаанд МУ-ын Ерөнхийлөгчийн дэргэдэх оюутан, залуучуудын хөгжлийн асуудал хариуцсан орон тооны бус зөвлөлөөс улсын хэмжээнд үйл ажиллагаа явуулж буй 95 их, дээд сургуулийн оюутнуудын дунд зохион байгуулсан. Уг хэлэлцүүлэгт оролцсон оюутан залуусын дийлэнх хувь нь зуны амралтаараа болон хичээлийн бус цагаар хөдөлмөр эрхлэх хүсэлтээ байгаагаа илэрхийлэн, хууль эрх зүйн орчныг сайжруулах шаардлагатай хэмээн үзэж байв.

    Хөтөлбөрийн хүрээнд энэ зун 1000 оюутныг Монголын 21 аймаг, есөн дүүрэгт ажлын байраар зуучлахаар ажиллаж байна. Нэмж хэлэхэд Монгол Улсын Ерөнхийлөгчийн бодлого үйл ажиллагааны хөтөлбөрт оюутныг цагийн ажилд, төгссөн оюутныг ажлын байраар хангасан аж ахуйн нэгж байгууллагуудыг хууль эрх зүйн хүрээнд дэмжих заалт байдаг.

    Түүнчлэн энэ оны 9 дүгээр сард Төрийн ордонд оюутан залуусыг ажлын байраар хангаж буй ААН-үүдийн төлөөлөл оюутныг оролцуулсан арга хэмжээг зохион байгуулж,  хууль эрх зүйн орчны болон тулгамдаж буй асуудлаар нээлттэй хэлэлцүүлэг хийхээр төлөвлөж байна” гэлээ.

    Мөн тэрбээр “Монгол Улсын Ерөнхийлөгчийн бодлого үйл ажиллагааны хөтөлбөрт оюутныг цагийн ажил, хичээлийн хажуугаар болон төгссөн оюутныг ажлын байраар ААН-үүдийг Ерөнхийлөгчийн зүгээс хууль эрх зүйн хүрээнд дэмжинэ гэснийг ААН, компаниуддаа дуулгалаа.

     Мөн үеэр оюутны хөдөлмөр эрхлэлтийг төрөөс баримтлах бодлогын талаар Нийслэлийн хөдөлмөр эрхлэлтийн газрын дарга С.Ганзориг, “Энержи ресурс” ХХК-ийн үйл ажиллагаа, нийгмийн хариуцлагын чиглэлээр хийж буй ажлын талаар тус компанийн нийгмийн хариуцлагын менежер Г.Отгонтуяа танилцуулга илтгэл тавилаа.  

    “Энержи Ресурс” компани “Цалинтай оюутан” хөтөлбөрийг 2018 оноос хэрэгжүүлж эхэлсэн бөгөөд энэ хүрээнд Өмнөговь аймгийн Цогтцэций, Цогт-Овоо, Ханхонгор сумын нийт 44 оюутнуудыг хамруулжээ.  Мөн “ICareer” ХХК-ийн менежер Н.Мөнхцэцэг оюутан залууст зориулсан ажлын байрны онцлог нөхцөлийг харуулсан сайт нээснээ танилцуулаад, өөрийн ур чадвартаа таарсан ажлыг хийх боломжтой гэлээ.

    Хөтөлбөрт хамрагдсан “Этүгэн” их сургуулийн 2 дугаар дамжааны оюутан Б.Армангуль:Миний хувьд сургуулийн маань төлбөр өндөр болохоор аав, ээждээ бага ч гэсэн туслах гэсэн үүднээс зун амрах хугацаанд ажиллая гэсэн бодолтой байгаа. Өмнө нь хувиараа бизнес эрхэлдэг хүний дэлгүүр жимс, хүнсний ногоо худалдаалж байсан. Өдрийн 20 мянган төгрөгийн цалинтай ажиллаж байсан. Харин энхүү хөтөлбөрт хамрагдчихвал цалин өндөр, хамгийн гол нь найдвартай, томоохон компаниудад ажиллаж туршлага мэдлэгээ дээшлүүлэх боломжтой.

    Latest 150
    Latest 150