МҮХАҮТ ЭРДЭНЭС ҮТП ХХК-ТАЙ ХАМТЫН АЖИЛЛАГААНЫ САНАМЖ БИЧИГ БАЙГУУЛЛАА
Хүнд үйлдвэрийн салбарын төрийн өмчит үйлдвэрлэл, технологийн паркийн удирдлагын хуулийн этгээдийн үйл ажиллагаа, Гадаад, дотоодын хөрөнгө оруулагч аж ахуйн нэгжийн хоорондын хамтын ажиллагааг сайжруулах замаар Монгол Улсад төрийн өмчит үйлдвэрлэл, технологийн парк байгуулах, паркийн нэгжээр оролцох этгээдийг татан оролцуулах, паркийн судалгаа, хөгжлийн төвийг хөгжүүлэх хүрээнд хамтран ажиллах санамж бичигт МҮХАҮТ-ын Гүйцэтгэх захирал Т.Дүүрэн, Эрдэнэс ҮТП ХХК-ийн Гүйцэтгэх захирал Н.Мөнх-Идэр гарын үсэг зурлаа.
Санамж бичгийн хүрээнд технологид суурилсан өрсөлдөхүйц гарааны компани, жижиг дунд үйлдвэрийг бий болгон хөгжүүлэх, бойжуулах шинэ технологи, инновацыг эдийн засгийн эргэлтэд оруулах чиглэлээр хамтарсан төсөл хөтөлбөр, арга хэмжээнүүдийг санаачлан хэрэгжүүлж, холбогдох эрдэм шинжилгээний байгууллагууд, бизнесийн салбарын хамтарсан судалгаа шинжилгээний төсөл хэрэгжүүлэх, судалгааны ажил хамтран хийж гүйцэтгэх юм. Түүнчлэн үйлдвэр технологийн парк, боловсруулах үйлдвэр, хүнд үйлдвэрийн салбарын хууль эрх зүйн орчныг сайжруулах, шинэчлэх, хууль тогтоомжийн төсөл боловсруулахад хамтарч ажиллана. Мөн салбарын өнөөгийн байдал, цаашдын чиг хандлага болон олон улсын хөгжлийн чиг хандлагын чиглэлээр харьцуулсан судалгаа, шинжилгээний үйл ажиллагааг хамтран хэрэгжүүлэх , шинэ технологи, техникийг нэвтрүүлэх талаар МҮХАҮТ, гишүүн байгууллагуудтай хамтран ажиллах, салбарт үйл ажиллагаа явуулж буй хувийн хэвшлийн аж ахуйн нэгжүүдтэй харилцан туршлага солилцоход хамтран ажиллахаар болов.
МҮХАҮТ-ын дэргэдэх Бизнес академиар дамжуулан Эрдэнэс ҮТП-ын ажилтнуудыг чадавхжуулах чиглэлээр хамтран сургалт, хөтөлбөр хэрэгжүүлэх, хүнд үйлдвэрийн салбарын онцлог, салбарын хууль тогтоомж болон бодит үр нөлөөг таниулахад чиглэсэн олон талт арга хэмжээнүүдийг хамтран зохион байгуулах талаар тогтлоо.