"MEMBER CARE": Хөгжиж, дэвших боломжоо олж харсан 103 аж ахуй нэгж МҮХАҮТ-д гишүүнээр элслээ

МҮХАҮТ-аас шинээр гишүүн болсон аж ахуй нэгжүүдддээ танхимын үйл ажиллагааг бүрэн таниулах, шинэ гишүүдээ хооронд нь таниулах, хэрэгцээтэй бүтээгдэхүүн үйлчилгээгээ газар дээр нь үзүүлэхээр “Member care” арга хэмжээг уламжлал болгон зохион байгуулдаг. Өнөөдөр эл арга хэмжээ болж, 2024 оны гуравдугаар улиралд гишүүнээр элссэн 100 гаруй аж ахуй нэгжид гэрчилгээг нь гардуулж, цаашид бизнесийн үйл ажиллагаагаа улам өргөжүүлэн, хамтран ажиллахыг хүсэв. Уг үйл ажиллагаанд МҮХАҮТ-ын бүх газрын алба хаагчид оролцож, өөрсдийн газруудын чиг үүрэг, хийж буй ажлуудаа шинэ гишүүддээ танилцуулж, мэдээлэл өглөө.

Нээлтийн үеэр 2017 онд байгуулагдаж, өнөөдрийг хүртэл тогтвортой үйл ажиллагаа явуулж байгаа, МҮХАҮТ-ын гишүүн “Зөрөг жигүүр” ХХК-ийн дэргэдэх “G river ballet studio” бүжгийн студийн бүжигчид ирж, шинээр элсэж буй аж ахуй нэгжүүдэд мэндчилгээ дэвшүүлсэн юм. 

Нээлтийн үеэр МҮХАҮТ-ын дэд захирал Ц.Магнайбаатар үг хэлэв. Тэрбээр “Гишүүн болсон, гишүүний ангилалаа дээшлүүлж байгаа, “Women owned” тохирлын тэмдэг болзлыг хангаж, авахаар хүрэлцэн ирсэн та бүхэнд энэ өдрийн мэнд хүргэе. Танхимын гишүүнчлэл өргөжин тэлэх нь бизнес эрхлэгчдийн дуу хоолой хүчтэй болж, нөлөөлөл нэмэгдэх төдийгүй, бизнес хоорондын хамтын ажиллагааны сүлжээ өргөжих, харилцан ашигтай түншлэлийг хөгжүүлэхэд үр дүнгээ өгнө гэж бодож байна” гэлээ.

МҮХАҮТ нь “Мember care” арга хэмжээний үеэр тэргүүлэгч гишүүдээ урьж оролцуулж, бизнесийн түүх замналтай нь танилцаж, шинэ аж ахуй нэгжүүдтэйгээ уулзуулдаг уламжлалтай билээ. Энэ хүрээнд МҮХАҮТ-ын Удирдах зөвлөлийн гишүүн, “Өгөөж Чихэр боов” компанийн ТУЗ-ийн дарга С.Түмэнгэрэл хүрэлцэн ирсэн юм. Тэрбээр “Манай компани 1998 оноос хойш МҮХАҮТ-ын гишүүн болсон. Миний хувьд янз бүрийн ТББ-д их л орсон. Янз бүрийн ТББ-д орохдоо бидэнд ямар хэрэгтэй вэ, юу өгөх вэ гэдгийг их бодож ордог. ТББ гэдэг бол хоёр талаасаа хамтран ажиллаж байж амжилтад хүрдэг юм гэдгийг олон байгуулагуудаас харж байсан. Эцсийн эцэст үлдсэн хоёр нь МҮХАҮТ болон “Жи Си Монгол” гээд залуучуудын байгуулллага. Авсан юм их дээ. Танхим хамгийн хүчтэй ТББ байгаасай гэж би хүсдэг. Тийм болгохын төлөө энэ олон жил хэлэх цагтаа хэлж, хэрэлдэх цагтаа хэрэлдэж ирсэн. Гэхдээ энэ ажил ганцхан танхимынх биш гишүүдийн ажил юм байна гэдгийг маш сайн ойлгосон. 10000,20000-уулаа болоосой. Танхим төр засагтай нэг ширээний хоёр талд суугаад ижил тэгш хэмжээнд ярьдаг болоосой гэж хүсдэг. Үүний төлөө та бүхэн элсэж орж байгаа байх. Гишүүд нь өөрсдөө маш их идэвхтэй байх ёстой юм шүү. Танхимын боломжуудыг маш сайн ашиглах хэрэгтэй” гэсэн юм.

Мөн МҮХАҮТ Голомт банктай хамтраад “Woman owned” тохирлын тэмдгийг найман аж ахуй нэгжид гардуулан өглөө. Монгол Улсад үйл ажиллагаа явуулж байгаа аж ахуй нэгжүүд, тэр дундаа жижиг дунд бизнес эрхлэгчдийн дийлэнх олонх хувь нь эмэгтэй бизнес эрхлэгчид байдаг. Тэднийг дэмжих, хооронд нь уялдаа холбоог нь сайжруулах, чадамжийг нь сайжруулах зорилгоор “Woman owned” тохирлын тэмдгийг гардуулдаг билээ.

Түүнчлэн 2030 онд хүртэл хэрэгжих Авлигатай тэмцэх үндэсний хөтөлбөрийн хүрээнд соён гэгээрүүлэх, шүгэл үлээх, авлигаас ангид байх зарчмуудыг МҮХАҮТ түгээн дэлгэрүүлэх үүрэг хүлээсэн. Тэр утгаараа өнөөдрийн арга хэмжээнд АТГ-ын төлөөлөл оролцож, авлигаас ангид байх талаарх мэдээллүүдийг аж ахуй нэгжүүдэд өглөө. Мөн ЖАЙКА олон улсын байгууллагатай хамтраад хөгжлийн бэрхшээлтэй иргэдийн хөдөлмөр эрхлэлтийг дэмжих чиглэлээр төсөл дээр хамтарч ажиллаж буй. Энэ хүрээнд хөгжлийн бэрхшээлтэй иргэдийн хөдөлмөр эрхлэлтийг дэмжих, ажлын байрны дадлага туршлага олгох, зааж зөвлөх, багшлах арга хэмжээний талаар ЖАЙКА олон улсын байгууллагаас ирж мэдээлэл, сургалт хийлээ.