"Монгол-Туркменистаны бизнес форум" Ашхабад хотод амжилттай боллоо
Монгол Улсын Ерөнхийлөгч Ухнаагийн Хүрэлсүхийн Туркменистан Улсад хийж байгаа төрийн айлчлалын хүрээнд Монгол-Туркменистаны бизнес форум", бизнес эрхлэгчдийн уулзалт Ашхабад хотод боллоо.
Тус форумыг нээж МҮХАҮТ-ын Гүйцэтгэх захирал Т.Дүүрэн, Туркменистаны ХАҮТ-ын дарга Мерген Гурдов, Туркменистаны нэхмэлийн аж үйлдвэрийн сайд Нурмухаммет Оразгельдыев, Монгол Улсын Хүнс, хөдөө аж ахуй, хөнгөн үйлдвэрийн сайд Жадамбын Энхбаяр нарын хүмүүс үг хэлсэн юм.
Мөн Туркменистан, Монголын бизнес эрхлэгчдийн хамтын ажиллагааны боломжуудыг энэ үеэр хэлэлцэв. Тухайлбал, Туркменистан, Монголын тээвэр, логистикийн салбарын чадавхи, хоёр орны экспорт-импорт, хөрөнгө оруулалтын боломжууд зэрэг сэдвийн хүрээнд хоёр талын бизнес эрхлэгчдэд танилцуулга хийж, бизнес уулзалтууд боллоо. Монголын талаас 40 гаруй, Туркменистаны талаас 40 гаруй аж ахуйн нэгж оролцсон уг форум нь хоёр орны бизнес эрхлэгчдийн хамтын ажиллагааг өргөжүүлэх, шинэ боломжуудыг нээхэд чиглэсэн чухал арга хэмжээ болсон байна.
МҮХАҮТ-ын гүйцэтгэх захирал Т.Дүүрэн "Монгол-Туркменистаны бизнес форум"-ыг нээж хэлсэн үгэндээ "Өнөөдрийн арга хэмжээг өндөр түвшинд зохион байгуулж, Монголын бизнесийн салбарын төлөөлөл биднийг халуун дотноор хүлээн авч байгаа Туркменистан Улсын Гадаад харилцааны яам болон Туркменистан Улсын Худалдаа, аж үйлдвэрийн танхимд гүн талархлаа илэрхийлье.
Энэхүү арга хэмжээнд хоёр орны хоорондын хамтын ажиллагааг бэхжүүлэх, шинэ бизнес боломжуудыг судлах, хөрөнгө оруулалтын харилцаагаа өргөжүүлэх зорилгоор Монгол Улсаас хийн хоолой, худалдаа, үйлдвэрлэл, газрын тосны салбарын нийт 44 ААН-үүд мөн Туркменистан улсын 40 гаруй ААН оролцож байна. Энэхүү арга хэмжээнд хоёр улсын бизнес эрхлэгчид өргөн бүрэлдэхүүнээр оролцож байгаа нь манай хоёр улсын хооронд худалдаа, эдийн засгийн хамтын ажиллагааг өргөжүүлэх хүсэл сонирхол, боломж бололцоо маш их байгааг илтгэн харуулж байна.
Бид өнөөдөр Монголын үндэсний худалдаа, аж үйлдвэрийн танхим, Туркменистан Улсын Худалдаа аж үйлдвэрийн танхим хамтын ажиллагааны санамж бичигт гарын үсэг зурна. Энэхүү санамж бичиг нь хоёр улсын бизнес эрхлэгчдийн хооронд худалдаа, хөрөнгө оруулалт, үйлчилгээ, аж үйлдвэрийн бүх салбарын яриа хэлэлцээ, хамтын ажиллагааг хөгжүүлэх, бизнес эрхлэгчдийн хамтын ажиллагааны санаачлагыг дэмжих зорилго бүхий хамтын ажиллагааны механизм байх юм.
Цаашид МҮХАҮТ-ын зүгээс эдийн засгийн хамтын ажиллагааг улам өргөжүүлэх, худалдааны тэнцлийг хангах, хоёр улсын хамтарсан төсөл хөтөлбөрүүдийг хэрэгжүүлэх, хөрөнгө оруулалтыг нэмэгдүүлэх, худалдааг хөнгөвчлөх, тээвэр логистикийн асуудлуудыг шийдвэрлэх чиглэлээр нягт хамтран ажиллах болно. Монгол улс, Туркменистан хоорондын логистикийн боломжуудыг нээх нь хоёр улсын эдийн засагт үр ашигтай. Монгол, Туркменистан хоорондын тээвэрлэлтийн шинэ маршрутуудыг бий болгох нь хоёр улсын географийн байрлал болон авто зам, төмөр замын сүлжээг ашиглан богино хугацаанд тээвэрлэх боломжтой. Логистикийн төвүүдийг байгууснаар энэ нь бараа бүтээгдэхүүнийг хурдан хугацаанд хадгалах, ялгах, тээвэрлэх боломжийг нэмэгдүүлнэ.
Манай хоёр улсын худалдаа, эдийн засгийн хамтын ажиллагаа улам тэлнэ гэдэгт итгэлтэй байна." гэсэн юм.