МҮХАҮТ-ын Ерөнхийлөгч Д.Энхтүвшин, дэд захирал Ц.Магнайбаатар нар “Шинэ Хархорум” хотын бүтээн байгуулалтыг хэрэгжүүлэх ерөнхий төлөвлөгөөний төсөлтэй танилцлаа

“Хархорум хотыг сэргээн байгуулах тухай” Монгол Улсын Ерөнхийлөгчийн 2022 оны 230 дугаар зарлиг, Орхоны хөндийд "Шинэ Хархорум" хот байгуулах тухай Улсын Их хурлын 2023 оны 07 дугаар тогтоолын дагуу Засгийн газрын 2023 оны 40 дүгээр тогтоолоор “Шинэ Хархорум” хотын бүтээн байгуулалтын асуудал хариуцсан захиргаа байгуулагдан шинэ хот байгуулахад шаардлагатай суурь судалгааг боловсруулан, хөгжлийн ерөнхий төлөвлөгөө боловсруулах ажлын бэлтгэлийг ханган ажиллаж байна.

Тус захиргаанаас дотоодын болон гадаадын хөрөнгө оруулагч, аж ахуйн нэгж байгууллагуудад “Шинэ Хархорум” хотын төлөвлөлтийн урьдчилсан шийдлийг боловсруулан олон нийт, мэргэжлийн байгууллага, гадаад, дотоодын хөрөнгө оруулагч нарт хүргэх үйл ажиллагааг үе шаттайгаар эхлүүлж байгаа талаар танилцуулсан юм.

Мөн хотын алсын хараа, хөгжлийн тэргүүлэх чиглэл, ирээдүйн хотын дүр төрх, инженерийн шийдлүүдийг тодорхойлохдоо олон улсын шилдэг архитектор, хот төлөвлөгч, инженерүүдийн шинэлэг санаа, шийдлийг тусгах зорилгоор хөгжлийн ерөнхий төлөвлөгөөний үзэл баримтлал /концепц/-ыг боловсруулах олон улсын нээлттэй сонгон шалгаруулалтыг зарлахаа мэдэгдлээ.