Монгол - Хятад - Оросын Худалдаа, аж үйлдвэрийн танхимуудын худалдаа, эдийн засгийн 17 дахь удаагийн чуулга уулзалт
Монгол - Хятад - Оросын Худалдаа, аж үйлдвэрийн танхимуудын худалдаа, эдийн засгийн 17 дахь удаагийн чуулга уулзалт БНХАУ-ын ӨМӨЗО-ны Бугат хотод (2024.08.16) зохион байгуулагдлаа. Энэ удаагийн чуулганд Хятад, Оросын талаас ӨМӨЗО-ны дэд тэргүүлэгч Ян Жинг, БНХАУ-ын Олон улсын худалдааг дэмжих хорооны орлогч дарга Ю Жианг Лонг, ОХУ-ын Дорнод Сибирийн ХАҮТ-ын Ерөнхийлөгч Соболь Алексей Иванович, ӨМӨЗО-ны Бугат хотын дарга Жанг Руй нарын зэрэг 140 төлөөлөгчид оролцож байна. Монголын талаас МҮХАҮТ-ын Гүйцэтгэх захирал Т.Дүүрэнгээр ахлуулсан төлөөлөгчид, тэр дундаа Дорноговь аймгийн засаг дарга О.Батжаргал, МҮХАҮТ-ын 17 аймаг дахь салбар танхимын дарга нар болон 40 орчим бизнес эрхлэгчдийн өргөн бүрэлдэхүүнтэйгээр оролцож байна.
Танхимын Гүйцэтгэх захирал Т.Дүүрэн чуулганы индэрээс хэлсэн үгэндээ 3 улсын Танхимууд чөлөөт бүсүүдийг хөгжүүлэх мөн тээвэр логистикийн саадгүй байдлыг хангахад хамтран ажиллах шаардлагатай. Энэ ажлын хүрээнд логистикийн агуулах “Hub”-уудыг чөлөөт бүсүүд дээр хамтран байгуулах, экспортын төвүүдтэй хамтран ажиллах нь чухал ач холбогдолтой гэдгийг онцоллоо. МҮХАҮТ-ын бүтцэд Экспорт, импортыг дэмжих төв шинээр байгуулагдсан бөгөөд дээрх асуудлуудыг ажил хэрэг болгоход Хятад, Оросын талтай бүх талаар хамтран ажиллахад бэлэн байна гэдгээ илэрхийллээ. Түүнчлэн худалдааны хууль эрх зүй, хөрөнгө оруулагч нарын хуулийн эрхийн хамгаалал үйлчилгээ үзүүлэхээр БНХАУ-ын Олон улсын худалдааг дэмжих хорооны хуулийн хэлтэстэй хамтран МҮХАҮТ-ын бүтцэд хуулийн үйлчилгээний төв байгуулах ажлыг эрчимжүүлэх тухай дурдлаа.
Гурван улсын худалдаа, аж үйлдвэрийн танхимууд болон бизнес эрхлэгчид худалдаа, эдийн засгийн асуудлыг хэлэлцэх хамгийн том платформ болж хөгжиж ирсэн 17 дахь удаагийн чуулган хөдөө аж ахуйн ногоон бүтээгдэхүүн, эрчим хүч, соёл аялал жуулчлал, худалдааны хууль эрх зүй чиглэлийн хүрээнд явагдаж, ХАА-н салбарт Төв аймгийн ИТХ-ын төлөөлөгч С.Цагаанбаатар, Эрчим хүчний салбар хуралдаанд МҮХАҮТ-ын Эрчим хүчний зөвлөлийн дарга Д.Ганхуяг, аялал жуучлалын салбар хуралдаанд Өвөрхангай аймгийн салбар танхимын дарга Б.Ууганбаяр, Хөвсгөл аймгаас Ариун-Өд ХХК-ний захирал Ө.Ариумаа, Зуут трэйвл ХХК-ний захирал А.Энхзул, хуулийн хэлэлцүүлэгт МОУА-ын дарга С.Энхцэцэг, МОУА-ын нарийн бичгийн дарга Шинэбаяр, УБЕГ-ын Хуулийн этгээдийн улсын бүртгэлийн газрын дарга Ж.Аюуш нар илтгэл тавьж оролцлоо.