Европын Холбооны Элчин сайд нар Ханбогд Кашимер компанид зочиллоо
Европын Холбооноос Монгол Улсад суугаа Элчин сайд, Төлөөлөгчийн газрын тэргүүн Аксель Никэйз болон Европын Холбооны орнуудын бусад элчин сайд, төлөөлөгчид 5-р сарын 19-ний өдөр Ханбогд Кашимер ХХК-ийн нарны эрчим хүчээр ажилладаг анхан шатны боловсруулах үйлдвэр, сүлжмэлийн үйлдвэр болон компанийн үйл ажиллагаатай танилцлаа. Ханбогд Кашимер ХХК-ийн үйлдвэр, оффис нь нарны цахилгаан үүсгүүрийг ашиглаж хүлэмжийн хийг жилд 25,531,2 киловатаар бууруулж, 796 ширхэг мод тарьсантай тэнцэх агаарын бохирдлыг бууруулахад хувь нэмэрээ оруулан байгаль орчинд ээлтэй, тогтвортой үйлдвэрлэлийг дэмжин ажиллаж байна.
Мөн Ханбогд Кашимер ХХК нь ноос, ноолуурын салбараас анх удаа НҮБ-ын Даян дэлхийн гэрээнд үүрэг амлалт хүлээн нэгдсэн аж ахуйн нэгж төдийгүй эмэгтэй бизнес эрхлэгчдийг дэмжих SheTrades төвийн гишүүн байгууллага юм.
НҮБ-ын ДДГ нь дэлхий даяарх бизнесийн тогтвортой байдал, мөн тэдний нийгмийн сайн сайхны төлөөх үйл ажиллагааг дэмжих зорилгоор 2000 оноос хэрэгжиж буй олон улсын томоохон санаачилга юм. МҮХАҮТ энэхүү санаачилгад 2006 онд нэгдсэн бөгөөд бизнесийн төлөөллийн гол байгууллагын хувьд ДДГ-ний үндсэн зорилтуудыг дэмжин ажиллаж байна.
Энэхүү уулзалтын үеэр Ханбогд Кашимер бараа, бүтээгдэхүүнийхээ дээжээс танилцуулсан бөгөөд бүтээгдэхүүний савлагаа болон шошго дээрх “Women Owned” тохирлын тэмдэгтийг тайлбарлан санал солилцлоо.
Ханбогд Кашимер ХХК-ийн ерөнхий захирал, Монголын хөнгөн аж үйлдвэрлэлийн салбарын анхны эмэгтэй Хөдөлмөрийн баатар Ч. Ганцэцэг болон Европын Холбооны Элчин сайд, төлөөлөгчид байгаль орчинд ээлтэй бүтээгдэхүүн үйлдвэрлэл, экспортын боломж, санхүүгийн дэмжлэг болон ноос ноолуурын салбарын өнөөгийн нөхцөл байдлын талаар нээлттэй ярилцлаа.