“Олон Улсын экспортын бизнес форум, үзэсгэлэн”-д Монголын бизнес эрхлэгчид, ААН-үүдийг урив
МҮХАҮТ-ын Ерөнхий нарийн бичгийн дарга С.Баясгалан “ОХУ-ын Экспортын төв”-ийн төлөөлөгчдийг хүлээн авч уулзлаа. Уулзалтаар хоёр улсын бизнесийн хамтын ажиллагааг өргөжүүлэх, худалдаа, хөрөнгө оруулалтыг нэмэгдүүлэх, экспертизийн үйлчилгээний талаар туршлага солилцох зэрэг шинэ санаачилгууд болон боломжуудын талаар санал солилцов.
Түүнчлэн бизнес эрхлэгчдийн бараа бүтээгдэхүүнийг хоёр улсын зах зээлд таниулах зорилгоор МҮХАҮТ-ын мэдээллийн нэгдсэн сүлжээ www.trademongolia.mn цахим платформ дээр ОХУ-ын ААН-ийн мэдээллийг байршуулах болон ОХУ-ын “Мой экспорт” платформ дээр Монгол Улсын аж ахуйн нэгжүүдэд нэвтрэх боломжийг хангах талаар хамтран ажиллахаар боллоо.
Мөн тус төвөөс 2024 оны 10-р сарын 14-ний өдөр ОХУ-ын Москва хотноо зохион байгуулагдах “Олон Улсын экспортын бизнес форум, үзэсгэлэн”-д Монголын бизнес эрхлэгчид, аж ахуйн нэгжүүдийг оролцуулж хамтран ажиллах Урилгыг МҮХАҮТ-д гардуулан өглөө.