Хөрөнгө оруулалтын цахим систем /PIMIS/ болон Татварын удирдлагын нэгдсэн систем /TAIS/-ийг сайжруулах талаар санал солилцох уулзалт зохион байгууллаа.
МҮХАҮТ-ын дэд захирал Ц.Магнайбаатар “Төсвийн санхүүгийн удирдлагын ил тод үр ашигтай байдал” төсөл хэрэгжүүлж буй багийн АХБ-ны Хөрөнгө оруулалтын олон улсын зөвлөх Ичиро Окумура, Татварын олон улсын зөвлөх Мартин Бергвэрф нарыг хүлээн авч уулзлаа.
Дэд захирал Ц.Магнайбаатар МҮХАҮТ-ын үйл ажиллагаа болон танхимаас тогтмол явуулдаг “Монголын бизнесийн орчин”, “Хүнд суртлын индекс” зэрэг судалгаагаараа хөрөнгө оруулалт, татварын орчныг үнэлдэг талаар танилцуулав. Мөн эдгээр асуудлаар УИХ, ЗГ, холбогдох төрийн байгууллагуудтай хамтран уулзалт, хэлэлцүүлэг зохион байгуулж, санал зөвлөмжийг хүргүүлдэг бөгөөд судалгааны үр дүн болон санал, зөвлөмжийг хуваалцах боломжтойг дурдав.
АХБ-ны төслийн багийн зүгээс төслийн ач холбогдол, үр дүнгийн талаар танилцуулан, PIMIS системд төрийн өмчит үйлдвэрийн газруудын хэрэгжүүлж буй хөрөнгө оруулалтын төсөл, арга хэмжээг оруулахаар төлөвлөж буйг онцолсон юм.
Тус уулзалтын дүнд төсвийн хөрөнгө оруулалтын ил тод, нээлттэй байдлыг сайжруулах, гадны болон дотоодын хөрөнгө оруулагч, бизнес эрхлэгчдэд үр ашигтай татварын системийг бий болгох чиглэлээр хамтран ажиллахаар боллоо.