МҮХАҮТ-ын хөндлөнгийн шинжээчдийг газрын тосны бүтээгдэхүүний хэмжилт хийх ХАБ-ын сургалтад хамрууллаа
МҮХАҮТ-ын Хэрэглэгч үйлчилгээний газраас нийт экспертүүддээ Хөдөлмөр аюулгүй байдал, эрүүл ахуй болон газрын тосны бүтээгдэхүүний хэмжилт тооцоолол хийх аргачлалын талаар сургалтыг 2024 оны 10-р сарын 14-15-ны өдрүүдэд амжилттай зохион байгууллаа. Эхний өдөр танхимын сургалт орсон бөгөөд ШУТИС ХШУС Химийн инженерчлэлийн салбарын дэд профессор, доктор, Монгол Улсын зөвлөх инженер Б.Тунгалагтамир "Газрын тосны бүтээгдэхүүнд хэмжилт хийх аргачлал" сэдвээр сургалт оров. Дараа нь МҮХАҮТ-ын хэрэглэгч үйлчилгээний газрын ачаа шалгагч Л.Оюунбилэг "Барааны тоо, чанар шалгах үйл ажиллагаа"-ны талаар ярьсан юм.
Харин хоёр дахь өдөр нь сургалтын хүрээнд Экспертүүд "Сод монгол групп" ХХК-ийн газрын тосны бүтээгдэхүүний агуулах дээр мэргэжлийн багш нарын хамт хөдөлмөр, аюулгүй байдлын багаж хэрэгслүүдийг ашиглан дадлага ажил хийлээ.
Монголын үндэсний худалдаа аж үйлдвэрийн танхим нь 1960 онд байгуулагдсан цагаасаа эхлэн экспорт, импортын бараа бүтээгдэхүүний тоо, чанарт хөндлөнгийн шинжээч /экспертиз/-ийн үйлчилгээг үзүүлж ирсэн бөгөөд энэ нь танхимын уламжлалт анхдагч үйлчилгээ юм.
Уг үйлчилгээний хүрээнд Улаанбаатар хот болон Эрдэнэт, Дархан, Увс, Өмнөговь, Дорнод, Дорноговь, Говьсүмбэр, Баян-Өлгий, Сэлэнгэ зэрэг аймагт нийт 18 эксперт ажиллаж байна.