Монголын бизнесийн салбарынхан Туркийн ард иргэдэд хандив тусламж үзүүлсэнд талархал илэрхийллээ
МҮХАҮТ-ын Ерөнхийлөгч О.Амартүвшин Бүгд Найрамдах Турк Улсаас Монгол Улсад суух Онц бөгөөд Бүрэн Эрхт Элчин сайд Зафер Атештай уулзлаа. Элчин сайд Зафер Атеш уулзалтын эхэнд Турк Улсад өнгөрсөн хоёрдугаар сарын эхэнд болсон байгалийн гамшигт үзэгдэл, газар хөдлөлтийн үеэр Монголын ард түмэн Туркийн ард иргэдтэй сайн анд нөхдийн хувиар хамт байж, сэтгэл санааны болон бусад талаар дэмжиж тусалсанд талархал илэрхийллээ.
Түүнчлэн МҮХАҮТ-ын санаачилгаар Монголын бизнесийн салбарынхан Туркийн ард иргэдэд хандив тусламж үзүүлсэнд талархлаа илэрхийлэв. Мөн тэрээр Монгол Улсын Гадаад харилцааны сайдын Турк Улсад хийсэн айлчлал өндөр ач холбогдолтой болсныг тодотгоод, цаашид хоёр улсын худалдааны эргэлтийг 200 сая ам.долларт хүргэх шинэ зорилт тавьсан талаар дурдлаа.
МҮХАҮТ өнгөрсөн 2021 онд БНТУ-ын Истанбул, Анкара хотуудад хоёр удаагийн бизнес форумыг амжилттай зохион байгуулсан талаар Ерөнхийлөгч О.Амартүвшин дурдаад, хоёр улсын эдийн засаг, бизнесийн хамтын ажиллагааг цаашид ч улам хөгжүүлэхэд МҮХАҮТ, Туркийн талын харилцагч байгууллага болох Танхим, биржүүдийн холбоо мөн хоёр талын дипломат төлөөлөгчийн газруудтай хамтран ажиллана гэв.
Уулзалтын үеэр талууд хөдөө аж ахуйн салбар, тэр дундаа арьс шир боловсруулах үйлдвэрийг Туркийн талын технологи, хөрөнгө оруулалтаар байгуулах боломжийн талаар мөн эрүүл мэндийн салбар дахь хамтын ажиллагааны талаар санал солилцлоо.
Уулзалтын төгсгөлд Элчин сайд Зафер Атеш БНТУ-аас Монгол Улсад суугаа Элчин сайдын яам болон Элчин сайдын хувиар хоёр талын эдийн засаг, бизнесийн хамтын ажиллагааг бүх талаар дэмжиж ажиллана гэдгийг дахин илэрхийллээ.