Монгол-Беларусийн бизнес форум боллоо
МҮХАҮТ, Монгол Улсад суугаа Бүгд Найрамдах Беларусь Улсын Элчин Сайдын Яам, Беларусын Худалдаа Аж Үйлдвэрийн Танхимтай хамтран “Монгол-Беларусь бизнес форум”-ыг зохион байгууллаа. Форумын нээлтэд Бүгд Найрамдах Беларусь Улсаас Монгол Улсад суугаа Бүрэн Эрхт Элчин сайд Горелик Дмитрий Николаевич, МҮХАҮТ-ын Ерөнхийлөгч О.Амартүвшин нар оролцож үг хэллээ.
МҮХАҮТ-ын Ерөнхийлөгч О.Амартүвшин цаашид МҮХАҮТ-ын зүгээс БНБУ-ын хамтран ажилладаг талуудтай худалдаа, эдийн засгийн харилцаа, хамтын ажиллагааг улам өргөжүүлэх хүрээнд харилцан худалдааг нэмэгдүүлэх, тээвэр логистикийн асуудлуудыг шийдвэрлэхэд хамтран ажиллахаа илэрхийлээд хоёр орны хооронд хөдөө аж ахуйн салбарт Беларусийн дэвшилтэт технологийг нэвтрүүлэх, автотээврийн дамжин өнгөрөх гарцын нэвтрэх хүчин чадлыг нэмэгдүүлэх зэргээр хамтын ажиллагаагаа улам өргөжүүлэх шаардлагатай байгааг тэмдэглэв.
Бизнес форумд Беларусийн талаас хөдөө аж ахуй, хүнс, машин механизм, эрчим хүч зэрэг салбарын 28 компани Монголын талаас 30 гаруй компанийн төлөөлөл оролцлоо.
Манай улсаас БНБУ руу энэ оны 8 сарын байдлаар эрчим хүчний сэлбэг хэрэгсэл зэрэг 418.3 мянган ам.долларын бараа бүтээгдэхүүн экспортолсон бол Беларусиас Монгол Улс руу 30.9 сая ам.долларын бүтээгдэхүүн импортолжээ. Сүү, сүүн бүтээгдэхүүн, цөцгийн тос, хөдөө аж ахуйн машин механизм, комбайн, трактор, тусгай зориулалтын техник, дагалдах эд анги зэрэг бүтээгдэхүүн импортолсон байна.