“Бараа бүтэгдэхүүний гарал үүсэл ба хэрэглэгчийн мэдээлэл авах эрх” хэлэлцүүлэг боллоо
ШӨХТГ, МҮХАҮТ хамтран “Бараа бүтээгдэхүүний гарал үүсэл ба хэрэглэгчийн мэдээлэл авах эрх” хэлэлцүүлгийг зохион байгууллаа. Хэлэлцүүлэгт Шадар сайд С.Амарсайхан, ШӨХТГ-ын дарга С.Мөнхчулуун, МҮХАҮТ-ын дарга Т.Дүүрэн болон үйлдвэрлэгчид, импортлогчид, худалдааны байгууллагуудын төлөөлөл оролцлоо.
ШӨХТГ-аас “Бараа бүтээгдэхүүний гарал үүсэл ба хэрэглэгчийн мэдээлэл авах эрх” аяныг 2022 оны 9 дүгээр сарын 1-нээс 10 дугаар сарын 1 хүртэл хугацаанд зохион байгуулж, аяны хүрээнд хийгдсэн үйл ажиллагааг дүгнэж, цаашид анхаарах асуудал, хэрэгжүүлэх ажлын чиглэлийг тодорхойлох зорилгоор энэхүү хэлэлцүүлгийг зохион байгуулав.
Хэлэлцүүлгийн үеэр МҮХАҮТ-ын дарга Т.Дүүрэн “Цар тахлын дараах бизнесийн нөхцөл байдлын судалгаа”-ны үр дүнг танилцуулсан юм.
Цаашид бараа бүтээгдэхүүний гарал үүсэл, хэрэглэгчийн мэдээлэл авах эрхийг хангах чиглэлд анхаарч ажилласнаар хэрэглэгчдийг эрүүл, аюулгүй хүнсээр хангах нөхцөл боломж бүрдэж, бараа бүтээгдэхүүний хаяг шошго, орц, найрлагатай холбоотой эргэлзээ, гомдол багасах бөгөөд холбогдох стандартыг мөрдүүлэх, үйлдвэрлэгч, импортлогч, худалдааны байгууллага, хэрэглэгчдийн тал талын хариуцлагыг нэмэгдүүлэх зэрэг үр дүнтэй.