Уул уурхайн бус экспортыг хөгжүүлэхэд төрийн нэгдсэн бодлого, санхүүжилтийн тогтолцоо шаардлагатай байна
Монгол Улсын экспортын бүтцийг өөрчлөх, уул уурхайн бус экспортын бүтээгдэхүүний эзлэх хувийг нэмэгдүүлэх, экспортын бүтээгдэхүүнийг төрөлжүүлэх, экспортлогч үндэстэн болох зорилгоор Засгийн газар, Монголбанк, МҮХАҮТ хамтран “Экспортлогч үндэстэн-Шинэ сэргэлтийн бодлого” чуулганыг зохион байгууллаа.
Чуулганд экспорт хийх үйл явцад оролцож буй төрийн байгууллагууд, арилжааны банкууд, даатгалын байгууллагууд, экспортлогч ААН-ийн төлөөлөл оролцож, төр-хувийн хэвшлийн хамтын ажиллагааг өргөжүүлэх, уул уурхайн бус экспортод тулгамдаж буй асуудлуудын шийдэл, нэгдсэн бодлого хэрэгжүүлэх боломжийн талаар хэлэлцэж, дунд хугацааны төлөвлөгөөг боловсруулахад санал хүсэлтээ илэрхийлэв.
Монгол Улсын нийт экспортын 94 хувийг эрдэс баялгийн бүтээгдэхүүн бүрдүүлж, сүүлийн 20 гаруй жилд уул уурхайн бус бүтээгдэхүүний экспортод эзлэх хувь хэмжээ буурч байгаа учраас экспортыг баримжаалсан, импортыг орлосон үйлдвэрлэлийг дэмжсэн бодлого шаардлагатай байна. Экспортыг дэмжихийн тулд юун түрүүнд нэгдсэн бодлого хэрэгтэй гэдэгт оролцогчид санал нэгдэж байв. Түүнчлэн, экспортын санхүүжилтийн арга хэрэгслүүдийг нэвтрүүлэх, санхүүжилтийн тогтолцоог бий болгох шаардлагатай байна.
ААН-үүдийн хувьд экспортыг дэмжсэн гадаад худалдааны бодлого байхгүй байгаа учраас цаашид уул уурхайн бус экспортыг дэмжих, хөгжүүлэх бодлогыг боловсруулж, хэрэгжүүлэх , санхүүжилтийн тогтолцоог нэвтрүүлэх, экспортод шаардлагатай бичиг баримт бүрдүүлэх үйл явц, тээвэр логистик, худалдааг хөнгөвчлөх, нэг цонхны бодлогыг бодитоор хэрэгжүүлэх зэрэг ажил хэрэгч саналуудыг илэрхийллээ. Оролцогчдын саналыг нэгтгэн Засгийн газарт хүргүүлэх бөгөөд цаашид экспортыг дэмжсэн бодлого боловсруулахад ашиглах аж.