МҮХАҮТ-ЫН ЭЭЛЖИТ XXI ИХ ХУРАЛ
МҮХАҮТ-ын ээлжит XXI их хурал 2023 оны 9 дүгээр сарын 20-ны өдөр Улаанбаатар хотноо хуралдана.
МҮХАҮТ-ын дүрэмд зааснаар Үндэсний танхим нь байгууллага, аж ахуйн нэгж, иргэдийн үүсгэл санаачилга, гишүүнчлэлийн үндсэн дээр байгуулагдаж, өөрөө удирдах ёсонд тулгуурлан “Худалдаа, аж үйлдвэрийн танхимын тухай” Монгол Улсын хууль болон МҮХАҮТ-ын дүрэмд заасан эрх, үүргээ хэрэгжүүлэхтэй холбогдсон үйл ажиллагаа явуулах, төвийг сахисан, нийгэмд үйлчилдэг төрийн бус байгууллага юм.
Дөрвөн жилд нэг удаа болдог Их хурал нь танхимын удирдах дээд байгууллага бөгөөд ээлжит XXI их хурлаар дараах асуудлуудыг хэлэлцэнэ. Үүнд:
- МҮХАҮТ-ын 2019-2023 оны үйл ажиллагааны ба санхүүгийн тайлан танилцуулах
- Хяналтын зөвлөлийн тайлан танилцуулах
- МҮХАҮТ-ын Удирдах зөвлөлийн гишүүдийг сонгох, батлах
- МҮХАҮТ-ын Ерөнхийлөгчийг сонгох, батлах
- МҮХАҮТ-ын Хяналтын зөвлөлийн гишүүдийг сонгох, батлах
- Монгол Улсын эдийн засгийн нөхцөл байдлын талаар мэдээлэл танилцуулга хийх, тэргүүлэх асуудлуудыг тодорхойлох, танхимын үүрэг оролцоог хэлэлцэх.
Үндэсний хэмжээнд үйл ажиллагаа явуулж бизнес эрхлэгчдийн нийтлэг эрх ашгийг төлөөлөн хамгаалах, илэрхийлэх хуулиар хүлээсэн үүрэгтэй төрийн бус байгууллагын хувьд ирэх 4 жилд тус байгууллагыг удирдан чиглүүлэх Удирдах зөвлөл, Танхимын Ерөнхийлөгчийн сонгууль нь олон нийтийн анхаарлын төвд байдаг бөгөөд дотоод ардчиллын дагуу нийт гишүүд, хурлын төлөөлөгчид, бие даагчдын хувьд нэр дэвших, дэвшүүлэх үйл ажиллагаа нээлттэй, ил тод байдгаараа онцлогтой.
МҮХАҮТ-ын дүрмийн дагуу Үндэсний танхимын Удирдах зөвлөлд гишүүнээр элсээд 3-аас дээш жил болсон, гишүүний үүргийн ямар нэг зөрчилгүй танхимын гишүүд нэр дэвших эрхтэй бөгөөд 22 гишүүнийг төлөөлөх ардчиллын зарчмаар, үлдэх 53 гишүүнийг Их хурлын гишүүд дундаас шууд ардчиллын зарчмаар, Хяналтын зөвлөлийн гишүүдийг Их хурлын гишүүд дундаас тус тус нэр дэвшүүлэн сонгох ба нэр дэвшүүлэх ажлыг Их хурал эхлэхээс 2 хоногийн өмнө буюу 2023 оны 9 дүгээр сарын 18-ны өдрийн 17.00 цагаар дуусгавар болгож Танхимаас томилогдсон комисс нэр дэвшигчдийн материалыг хүлээн авч Их хуралд танилцуулна.
Танхимын Ерөнхийлөгч бөгөөд Удирдах зөвлөлийн дарга нь Үндэсний танхимыг гадаад, дотоодод төлөөлөх, Удирдах зөвлөлөөс олгосон болон Дүрэмд заасан эрх хэмжээний хүрээнд танхимын үйл ажиллагааг удирдан чиглүүлэх, танхимын олон улсын хамтын ажиллагааг идэвхжүүлэх, УИХ, Засгийн газар, төрийн болоод төрийн бус байгууллагуудтай гишүүд, бизнес эрхлэгчдийн эрх ашгийг төлөөлөн хамгаалах асуудлаар хамтарч ажиллах үндсэн чиг үүрэгтэй. Танхимын Ерөнхийлөгч бөгөөдУдирдах зөвлөлийн даргад нэр дэвшигчид мөрийн хөтөлбөр, товч намтраа бэлтгэн 2023 оны 9 дүгээр сарын 18-ны өдрийн 17.00 цагт МҮХАҮТ-ын байр, 403 тоот буюу Нэр дэвшүүлэх комисст хүлээлгэн өгнө.
МҮХАҮТ-ын гишүүн нь 2023 оны 8 дугаар сарын 10-ны өдрөөс өмнө МҮХАҮТ-д гишүүнээр элссэн бөгөөд 2023 оны 9 дүгээр сарын 15-ны өдрийн байдлаар гишүүнчлэлийн хураамжийг бүрэн төлснөөр ээлжит XXI их хуралд оролцох эрхтэй болно.
МҮХАҮТ-ын гишүүд Та бүхнийг их хуралдаа идэвхтэй оролцохыг урьж байна. Нэмэлт мэдээллийг дараах хаягаар холбогдон авна уу.
Бүртгэл, гишүүнчлэлтэй холбоо мэдээлэл:
Утас: 77277070 /2/, 99046587
Цахим шуудан: membership@mongolchamber.mn
Цахим хуудас: www.mongolchamber.mn
МҮХАҮТ-ын байр, 305 тоот
Нэр дэвшихтэй холбоотой мэдээлэл:
Утас: 99107371, 95050084
Цахим шуудан: policy@mongolchamber.mn
МҮХАҮТ-ын байр, 403 тоот
