МҮХАҮТ-аас Монгол Улсын Их хурлын 2024 оны ээлжит сонгуульд оролцох намуудын мөрийн хөтөлбөрт өгөх санал
“Алсын хараа 2050” Монгол улсын урт хугацааны хөгжлийн бодлогод Бизнесийн орчны ерөнхий үнэлгээг 2025 онд 3.5, 2030 онд 4.03 нэгжид хүргэхээр заасан. 2023 оны судалгаагаар бизнесийн орчны ерөнхий үнэлгээ 2.68 гэж үнэлэгдсэн нь цар тахлын өмнөх үеэс буурсан үзүүлэлт бөгөөд бизнес эрхлэгчдийн зүгээс эдийн засгийн салбаруудын бодлогын тогтвортой байдлыг хангах, хууль эрх зүйн зохицуулалтуудыг өөрчлөхдөө оролцогч талуудын нэгдсэн, нийтлэг саналыг идэвхтэй тусгадаг байх, төрийн байгууллагуудын уялдаа холбоог сайжруулах, бизнесийн маргаан шийдвэрлэх үйл ажиллагааг сайжруулах, татварын жигд, таатай орчныг бүрдүүлэх, зээлийн хүүг бууруулж, зээлийн нөхцөлийг сайжруулах, хүний нөөцийн нийлүүлэлтийг нэмэгдүүлэх, бэлтгэх тогтолцоог шинэчлэх арга хэмжээг нэн тэргүүнд хэрэгжүүлэх шаардлагатай гэж үзсэн байна.
Мөн төр-хувийн хэвшлийн үр дүнтэй түншлэлийн хүрээнд эдийн засагт чухал ач холбогдолтой дэд бүтцийн томоохон төсөл, хөтөлбөрүүдийг цаг алдалгүй эхлүүлэх, төр бизнесийн салбарт хувийн хэвшилтэй өрсөлдөхгүй байхыг чухалчилсан байна.
2024 оны УИХ-ын ээлжит сонгуульд оролцох улс төрийн намуудын мөрийн хөтөлбөрт тусгахыг хүсэн бизнес эрхлэгчид болон бизнесийн зарим зөвлөл, холбоодоос ирүүлсэн саналуудыг нэгтгэн дараах байдлаар хүргүүлж байна.