Монгол Тайваний 20 дахь удаагийн бизнес форум Тайпэй хотноо зохион байгуулагдаж байна
МҮХАҮТ, Хятадын олон улсын эдийн засгийн хамтын ажиллагааны холбоотой хамтран жил бүр уламжлан болгон зохион байгуулдаг “Монгол-Тайваний худалдаа, эдийн засаг хамтын ажиллагааны форум”-ыг Тайпэй хотноо зохион байгууллаа. Энэ удаагийн бизнес форумд Монголын талаас Тайпэй дахь Улаанбаатар хотын худалдаа, эдийн засгийн төлөөлөгчийн газрын дарга Г.Төмөрбаатар, МҮХАҮТ-ын УЗ-ийн гишүүн, Өвөрхангай аймгийн салбар танхимын дарга Б.Ууганбаяр, Ховд аймгийн салбар танхимын дарга Б.Ганзориг нар оролцож байна. Тэгвэл Тайваний талаас Хятадын ОУ-ын эдийн засгийн хамтын ажиллагааны холбооны ТУЗ-ийн гишүүн, Тайваний судалгаанд суурилсан Био Эм үйлдвэрлэгчдийн холбооны үйл ажиллагаа хариуцсан захирал Карол Чэнг, Тайваний Гадаад харилцааны яамны Олон улсын хамтын ажиллагаа, эдийн засгийн хэлтсийн дарга Билл Кен-Минг Чен нар оролцож форумыг нээж үг хэллээ. 20 дахь удаагийн бизнес форум нь хүнсний үйлдвэрлэл, аялал жуулчлал, гадаад худалдаа, эм эмнэлгийн бараа, тоног төхөөрөмж, барилгын салбарын хүрээнд явагдаж байгаагаас Тайваний 15 ААН, Монголын 12 ААН-ийн 20 орчим бизнесийн төлөөлөл, үүнд Өвөрхангай аймгийн эм, эмнэлгийн салбарын таван байгууллага оролцож байгаагаараа онцлогтой юм.
Уулзалтын үеэр дээрх сэдвүүдээр Монгол, Тайваний оролцогчдын төлөөлөл илтгэл тавьж, салбарын сүүлийн үеийн хөгжлийн талаар харилцан мэдээлэл солилцсон юм. Тухайлбал, Монголын талаас эм, эмнэлгийн салбарыг төлөөлж “Оди Тан” ХХК, Өвөрхангай аймаг дахь Бүсийн оношлогоо эмчилгээний төвийн төлөөлөл илтгэл тавив. Мөн үеэр Монгол, Тайваний бизнес эрхлэгчдийн B2B уулзалт болж, хамтран ажиллах боломжийн талаар яриа хэлэлцээр өрнүүлэв.
Энэ удаагийн бизнес форум Тайпэй хотод жил бүр зохион байгуулагддаг “Ухаалаг хот” үзэсгэлэнгийн үеэр болж байгаагаараа онцлог бөгөөд Монголын бизнес төлөөллүүд энэхүү үзэсгэлэн мөн үзэж сонирхох юм.