Ёс зүй бол бизнесийн үндэс
Бизнесийн ёс зүйн талаарх ойлголтын судалгааны дүнгээр нийт оролцогчдын 89 хувь нь “Бизнесийн ёс зүй нь бизнесийн тогтвортой байдал болон ажилтны хувийн хөгжилд дундаас дээш түвшний эерэг нөлөөтэй” гэжээ. Ийм ч учраас “БИЗНЕСИЙН ЁС ЗҮЙ, ШУДАРГА БАЙДЛЫГ БЭХЖҮҮЛЭХ ТӨСӨЛ” - ийн II шатны үр дүнгийн хурлыг 2024 оны 4 сарын 4-нд зохион байгуулж МҮХАҮТ-ын Ерөнхийлөгч Д.Энхтүвшин хурлын нээлтийн үгэндээ бизнесийн ёс зүй, хариуцлага, ил тод байдал бол яригдахаас өөр аргагүй сэдэв хэмээгээд бизнесүүд ёс зүйн сургалтад хамрагдах хандлага нэмэгдэж байгаа нь энэ чиглэлийн сургалтуудын хэрэгцээ, шаардлага өндөр байгааг онцолсон.
Монголын Үндэсний Худалдаа Аж Үйлдвэрийн Танхим, Транспэрэнси Интернэшнл Монгол ТББ (ТИ-М) болон Рио Тинто Монгол ХХК (РТМ) Монгол Улс дахь бизнесийн ёс зүй, шударга байдлыг бэхжүүлэх, бизнесийн таатай орчныг дэмжих зорилтой санаачилсан Монгол Улс дахь бизнесийн ёс зүй, шударга байдлыг бэхжүүлэх “Бизнесийн ёс зүй, шударга байдлыг бэхжүүлэх төсөл”-ийг 2021 оны 05 сараас хамтран хэрэгжүүлж байна. Төслийн хүрээнд МҮХАҮТ -ын дэргэд Бизнесийн ёс зүйн төвийг байгуулан амжилттай ажиллаж байна.
“БИЗНЕСИЙН ЁС ЗҮЙ, ШУДАРГА БАЙДЛЫГ БЭХЖҮҮЛЭХ ТӨСӨЛ” - ийн II шатны үр дүнгийн хуралд Рио Тинто Монгол ХХК-ийн Гүйцэтгэх захирал Х.Амаржаргал, Монгол Улс дахь НҮБ-ын Суурин зохицуулагч Ноён Тапан Мишра нар мөн үг хэлсэн.
МҮХАҮТ - ын Ерөнхийлөгч Д.Энхтүвшин нээлтийн үгэндээ “Дэлхий ертөнц хурдацтай өөрчлөгдөж буй энэ цаг үед бизнес эрхлэгчид ашиг олохын зэрэгцээ хүн төрөлхтөн, байгаль дэлхий, хүрээлэн буй орчинд үзүүлэх сөрөг нөлөөллөө бууруулж, эерэг нөлөөллөө нэмэгдүүлэх, бизнесийн үйл ажиллагаагаа хариуцлагатайгаар эрхлэх зайлшгүй шаардлагатай болж байна. Олон нийт, үйлчлүүлэгчид, хөрөнгө оруулагчид, хамтрагчдын зүгээс ч илүү хариуцлагатай хамтын ажиллагаа, шийдвэр гаргалтыг хүсэж, шаардаж байна” гэсэн юм.
Мөн Рио Тинто Монгол ХХК - ийн Гүйцэтгэх захирал Х. Амаржаргал “Шударга, ил тод байдлыг хангаж, ёс зүйг эрхэмлэж ажиллах нь Рио Тинтогийн үнэт зүйлсийн салшгүй нэг хэсэг байдаг. Биднийг үйл ажиллагаагаа тогтвортой үргэлжлүүлж дэлхийн 36 улсад 50 мянган хүнтэй нүсэр том бизнесийн амжилттай авч яваагийн гол нууц, үндсэн суурь БИЗНЕСИЙН ЁС ЗҮЙ юм. Энэхүү туршлагаа Рио Тинто компани “Бизнесийн ёс зүй, шударга байдлыг бэхжүүлэх төсөл”-ийн хүрээнд Монголынхоо бусад бизнес эрхлэгчидтэй хуваалцдагтаа баяртай байдаг” хэмээн онцолсон бол НҮБ - ын Суурин төлөөлөгч Тапан Мишра “МҮХАҮТ болон Рио Тинто Монгол ХХК д төслийг амжилттай хэрэгжүүлж байгаад талархал илэрхийлээд МҮХАҮТ - ын дэргэдэх Бизнесийн ёс зүйн төвтэй хамтран Бизнесийн салбар тогтвортой хөгжлийг дэмжих олон улсын санаачилга болох НҮБ - ын Даян Дэлхийн гэрээний талаар бизнес эрхлэгчдэд мэдлэг ойлголт түгээх, зөвлөх үйлчилгээ үзүүлэх ажлуудыг хийж байгаа талаар тодотгосон.
Арга хэмжээний үеэр төслийн үр дүнг үнэлсэн судалгааг МҮХАҮТ – ын Эдийн засгийн судалгааны институцийн газрын дарга О.Түмэн–Амар танилцуулсан бол Бизнесийн ёс зүйн төвтэй хамтын ажиллагаатай ажилладаг хувийн хэвшлийн байгууллагуудын төлөөллүүд болох Премиум Нэксус ХК - ийн Гүйцэтгэх захирлын орлогч Г.Чинзориг “Хувийн хэвшилд бизнесийн ёс зүйг бий болгох нь”, ХААН Банкны Тогтвортой хөгжлийн газрын захирал М.Мандахмягмар “Даян дэлхийн гэрээг хэрэгжүүлж буй хувийн хэвшлийн сайн туршлага” сэдвүүдээр тус тус илтгэл танилцуулав.
Төслийн II шатанд нийт төр, хувийн хэвшлийн 264 байгууллагын 695 оролцогчийг сургалтад хамруулж, 345 байгууллагын 540 оролцогчийг хамруулан бизнесийн ёс зүй, комплаенсын талаар мэдлэг, ойлголтыг сайжруулах хэлэлцүүлэг, форум, арга хэмжээг зохион байгуулан 20 гаруй бизнесийн байгууллагад зөвлөх үйлчилгээ үзүүлж ажилласан байна. Бизнесийн ёс зүйн төв нь МҮХАҮТ - ын www.mongolchamber.mn сайтад цахим номын сан байршуулан ажиллуулдаг бөгөөд салбарын мэргэжилтнүүдийг шаардлагатай ном, гарын авлага, судалгааны материал зэрэг мэдээ, мэдээллээр тогтмол хангаж байна.