Хамтдаа хөгжих B2B платформыг хөгжүүлж байна
Австрали улсын Засгийн газрын Гадаад хэрэг, худалдааны яамны Өмнөд болон Төв Ази хариуцсан Тэргүүн туслах нарийн бичгийн дарга Сара Стори 2024 оны 4 сарын 08-ны өдөр МҮХАҮТ-д зочлов.
Энэ үеэр Австрали улсаас Монгол Улсад суугаа Элчин сайд Эрхэмсэг хатагтай Кэти Смит, Азийн сангийн Монгол Улс дахь суурин төлөөлөгч хатагтай Сара Тэйлор болон албаны бусад төлөөлөгч мөн хүрэлцэн ирсэн бөгөөд зочдыг МҮХАҮТ-ын Ерөнхийлөгч Д.Энхтүвшин, Дэд захирал Ц.Магнайбаатар, Ерөнхий нарийн бичгийн дарга С.Баясгалан нар хүлээн авч уулзлаа.
Хатагтай Сара Сторэй Азийн сан, Канад Улсын Засгийн газрын дэмжлэгтэйгээр 2022 оны 10-р сард МҮХАҮТ-ын дэргэд байгуулагдсан Бизнес эрхлэгч эмэгтэйчүүдийн төвийн үйл ажиллагаатай танилцав. Тус төв нээгдснээр МҮХАҮТ-аас явуулдаг үйл ажиллагаан дахь бизнес эрхлэгч эмэгтэйчүүдийн оролцоо идэвхижиж, тогтмолжсон, эмэгтэй бизнес эрхлэгчдийг чадавхжуулах хөтөлбөрүүд нэгдсэн байдлаар хэрэгжих боломж бий болсон зэрэг эерэг үр дүн гарсан төдийгүй тус төвийн үйл ажиллагаанд тулгуурлаж эмэгтэйчүүдийн эдийн засаг дахь оролцоог нэмэгдүүлэх, чадавхжуулах инкубатор төслийг 2023 оны 10-р сар хүртэл амжилттай хэрэгжүүлж дууссан байна. Одоогийн байдлаар Азийн сан, МҮХАҮТ, Гэрэгэ системс хамтран бизнес эрхлэгч эмэгтэйчүүдийн нэгдэх, хамтдаа хөгжих талбар болох B2B платформыг хөгжүүлж байна.
Уулзалтын үеэр Бизнес эрхлэгч эмэгтэйчүүдийн төвийн сургалт, хөтөлбөрт хамрагдаж, амжилттай үйл ажиллагаа явуулж байгаа бизнес эрхлэгч эмэгтэйчүүд өөрсдийн бүтээгдэхүүн, үйлчилгээгээ танилцуулж, амжилтын түүхээсээ хуваалцлаа.
Мөн энэ үеэр МҮХАҮТ-ын Ерөнхийлөгч Д.Энхтүвшин Азийн сангийн Монгол Улс дахь Суурин төлөөлөгч хатагтай Сара Тэйлортэй хоёр талын уулзалт хийж хоёр байгууллагын хамтын ажиллагааны талаар санал солилцлоо.