Худалдааны салбар нэгдсэн бодлогогүй, эмх цэгцгүй байгааг шүүмжиллээ
Худалдааны салбарын өнөөгийн байдал, тулгамдаж буй асуудал хэлэлцүүлэг болж, ХХААХҮЯ, ГХЯ, МҮХАҮТ, холбогдох ТББ-ууд, мэргэжлийн холбоод, гадаад дотоод худалдаа эрхлэгчид оролцлоо.
Монгол Улсын эдийн засгийн хөгжлийн тулгуур болсон худалдааны салбар нь 2018 оны байдлаар ДНБ-ний 16.4 хувь, идэвхтэй үйл ажиллагаа явуулж байгаа аж ахуйн нэгжийн 40 орчим хувийг бүрдүүлж, 200 гаруй мянган хүнийг ажлын байраар тогтвортой хангаж байгаа томоохон салбар юм.
Хэлэлцүүлгийн үеэр МҮХАҮТ-аас Монголын бизнесийн орчны судалгааг танилцуулж, цаашид хэрэгжүүлбэл зохих арга хэмжээний талаар саналаа хүргүүллээ. Эдгээр санал нь худалдааг хөнгөвчлөх, тарифийн болон тарифын бус хөнгөлөлтүүдийг боловсронгуй болгох, хууль эрхзүйн орчинг сайжруулах чиглэлээр бизнес эрхлэгчдийг хамруулсан удаа дараагийн хэлэлцүүлгүүдээс нэгтгэсэн байр сууриуд юм.
Хэлэлцүүлэгт оролцогчид худалдааны салбарыг нэгтгэн зангидах төрийн захиргааны төв байгуулагагүй, худалдааны талаар төрөөс баримтлах нэгдсэн бодлогогүй, салбар дундын уялдаа холбоо болон хяналт хариуцлага сул, дотоод худалдаа эмх цэгцгүй, салбарын хүний нөөцийн бодлого алдагдсан талаар санал шүүмж өрнүүлж, шийдвэрлэх арга замыг хэлэлцэж, Худалдааны тухай хуулийн төсөлд санал өгөхөөр боллоо.