“Монголын алт МАК” ХХК-ийн үйлдвэрүүдтэй танилцах аялал зохион байгууллаа
МҮХАҮТ-аас 2023 оны шилдэг энтрепренер “Монголын алт МАК" ХХК-ийн үйлдвэрүүдтэй танилцах аялал зохион байгууллаа. Уг аялалд МҮХАҮТ-ын гишүүн бүхий "Ханбогд" кашимер ХХК, "ХААН банк", "Бетон урлан" ХХК, "Тэсо" групп, "Жем" интернейшнл, "Кристал хоум трейд", "Наран трейд", "Номинхолдинг", "Мөнххада" гэх мэт 30 орчим компанийн төлөөлөл, удирдах ажилтнууд хамрагдаж, нэг өдрийг "Монголын алт МАК" ХХК-ийн блок болон цонх хаалга, цементийн үйлдвэрүүдээр явж танилцлаа.
Тэд "Маш том, стандарт хангасан гайхалтай бүтээн байгуулалтууд хийжээ. Хүний оролцоогүй шахам үйлдвэрийн технологиудыг нь биширлээ. Цементийн үйлдвэр нь гэхэд орон нутагт байрлаж орон нутгийн иргэд болон 1000 орчим иргэнийг ажлын байраар хангасан нь энэ улс оронд оруулж буй хувь нэмэр гэж бодож байна. Бүх зүйлийг гаднаас импортлох биш дотооддоо ийм том үйлдвэрүүд байгуулаад ажиллах юм бол манай улс дорхноо хөгжих юм шиг санагдаж, сэтгэл дүүрэн байлаа. Ажилчдынхаа нийгмийн асуудал, амьдрах, ажиллах орчин нөхцлийг маш сайн бүрдүүлжээ" хэмээн бахархаж, суралцах зүйлс ч их байгаагаа илэрхийлсэн.
Тэд эхлээд Төв аймгийн Сэргэлэн суманд байрлах Мак Блок, Мак Евро Виндоор, Мак Евро Венти үйлдвэртэй танилцсан юм. "Монголын Алт МАК" ХХК нь 1993 онд үүсгэн байгуулагдсан. Дэлхийд тэргүүлэх сүүлийн үеийн дэвшилтэт техник технологийг үйл ажиллагаа, үйлдвэрлэлдээ нэвтрүүлж, импортыг орлох, нэмүү өртөг шингэсэн эцсийн бүтээгдэхүүн үйлдвэрлэн зах зээлд нийлүүлж буй компани.
"Монголын Алт МАК" ХХК-ийн "МАК Евро Блок" хийт бетоны үйлдвэр нь 2015 онд ашиглалтад орсон бөгөөд ХБНГУ-ын Тop-Werk группийн Hess AAC Systems-ийн технологиор Евро стандартын шаардлагыг хангасан автоклавын хийт бетоныг үйлдвэрлэн Монголын зах зээлд нийлүүлж байна. Евро Блок нь бат бэх, даац авах чадвар өндөртэй ч хөнгөн бүтэцтэй тул ашиглахад хялбар, хэлбэр гарган хөрөөдөх боломжтой орчин үеийн шийдэл бүхий барилгын дүүргэгч материал юм. Мөн галд тэсвэртэйгээс гадна дуу чимээг бүрэн тусгаарлах давуу талтай гэдгийг инженерүүд нь онцолж байлаа.
МАК Евро Виндоор хаалга цонхны үйлдвэр нь 2019 онд ашиглалтад орсон гурван төрлийн материалаар хаалга, цонх үйлдвэрлэх хүчин чадалтай үйлдвэр. Барилын хаалга, цонх хамгаалалт болон дизайны үүргийг нэгэн зэрэг гүйцэтгэдэг онцлогтой бүтээгдэхүүн билээ. Тэр ч утгаараа МАК Евро Виндоор үйлдвэр хамгаалалтын шаардлагад бүрэн нийцсэн бүтээгдэхүүнийг хуванцар, модон, хөнгөн цагаан материалаар үйлдвэрлэж байна. Барилгын материал үйлдвэрлэлийн салбар дахь ижил төстэй бүтээгдэхүүн үйлдвэрлэгчдээс ялгарах гол онцлог нь технологийн давуу тал юм. МАК Евро Виндоор үйлдвэр нь МАК-ийн бусад үйлдвэртэй адил Евро стандартын үйлдвэр бөгөөд европ технологи ашигласнаар өндөр чанарын дуу тусгаарлалттай, дулаан алдагдалгүй, хулгай орохоос бүрэн сэргийлсэн нарийн технологи бүхий эдэлгээ сайтай хаалга, цонхыг зах зээлд нийлүүлж байна.
МАК Евро Венти үйлдвэр нь барилгын агааржуулалтын чанарыг сайжруулж эрчим хүчний хэмнэлт бий болгож эрүүл, тав тухай орчин бүрдүүлэх Европ технологийн битүүмжлэл маш өндөр, хэмжээсний алдаагүй, удаан эдэлгээтэй, өндөр чанарын ган агааржуулалтын хоолойг Монголдоо үйлдвэрлэж байна.
Дорноговь аймгийн Даланжаргалан сумын нутагт байрлах МАК Евро Цемент үйлдвэр нь 2017 онд ашиглалтад орсон. Уг үйлдвэр ашиглалтад орсон цагаасаа хойш нийт 3.5 сая тонн цемент үйлдвэрлэн дотоодын зах зээлд борлуулж, 187.8 сая ам.долларын гадагшлах урсгалыг хаан 800 орчим хүнийг тогтвортой ажлын байраар хангаж байна.
Энэхүү үйлдвэр дотоодын ашигт малтмалаар баялаг бүтээж буй Монголын анхны робот лабораторитой, бүрэн автомат, байгаль орчинд ээлтэй, хуурай аргын цементийн үйлдвэр. Дотоодын ашигт малтмал гэж онцолж байгаагийн учир нь цементийн гол түүхий эд болох шохойн чулуу, шавар, элс, төмрийн хүдэр, гөлтгөнө зэргийг 100% өөрсдөө олборлон ашиглаж байна. Ингэснээр бүтээгдэхүүний чанар, үнэ, нийлүүлэлт тогтвортой байх боломж бүрдэж байгаа юм. Тэд жилдээ нэг сая тонн хүртэлх цемент үйлдвэрлэн дотоодын зах зээлд нийлүүлж байгаа ба чанартай бүтээгдэхүүнээр барилгын салбартаа хөрөнгө оруулан импортыг орлож, улсын төсөвт жилд 30-40 тэрбум төгрөгийн татвар төлж үйлдвэрлэгч компаниудыгаа манлайлан ажиллаж байна.
