Комплаенс, бизнесийн ёс зүйн зөвлөл байгууллаа
МҮХАҮТ-аас 2019 онд Комплаенсын үндэсний зөвлөлийг байгуулсан бол 2020 онд Бизнесийн ёс зүйн төвийг байгуулсан. Улмаар Комплаенсын үндэсний зөвлөл, Бизнесийн ёс зүйн төв хамтраад бизнесийн комплаенсийг таниулах, ёс зүйтэй бизнесийг хөгжүүлэх, соён гэгээрүлэх чиглэлээр тодорхой ажлуудыг хийж хэрэгжүүлсэн билээ. Тэгвэл МҮХАҮТ-аас Комплаенсийн үндэсний зөвлөлөө өргөжүүлээд, Бизнесийн комплаенс, Ёс зүйн зөвлөл болгож, анхны хурлыг өнөөдөр /2024.05.21/ хийлээ.
Хуралд өмнөх бүрэлдэхүүнд байсан гишүүн компаниудын төлөөллөөс гадна бизнесийн шинэ байгууллагуудын төлөөллүүд нэмэгдэж ирсэн байна. Тухайлбал, Комплаенсын өмнөх зөвлөлийн зөвлөх DHH Lab Mongolia ХХК-ийн удирдах зөвлөлийн дарга Б.Батзориг, Авлигатай тэмцэх үндэсний хөтөлбөрийг хэрэгжүүлэх хүрээнд хамтарч ажилладаг АТГ-ын Урьдчилан сэргийлэх, Соён гэгээрүүлэх хэлтсийн ахлах комиссар Д.Цэнд-Аюуш, Монголын банк бус санхүүгийн байгууллагуудын холбоо, Юнител групп, Тэсо групп, Монгол даатгал, Шунхлай групп, Мобиком корпораци, Мөнххада, Монос групп, Монголын хүнсчдийн холбоо, Монголын барилгын үндэсний ассоциаци, Ар И Ди Инк гэх мэт компаниудын төлөөлөл оролцлоо.
Хурлын үеэр МҮХАҮТ-ын орлогч дарга Ц.Магнайбаатар хэлэхдээ “МҮХАҮТ-ын дэргэд Комплаенсийн зөвлөл байгуулаад тодорхой ажлууд хийгээд явж байна. Мөн Рио Тинто Монгол компанийн санаачлагаар МҮХАҮТ-ын дэргэд Бизнесийн Ёс зүйн төв нээгдээд гурван жилийн нүүр үзэж, олон нийтэд чиглэсэн соён гэгээрүүлэх үйл ажиллагаа хийж, хэрэгжүүлж байна. Одоо Комплаенсийн зөвлөл болон Бизнесийн Ёс зүйн төвийн үйл ажиллагааг уялдуулан өргөжүүлэх зорилготойгоор өнөөдрийн хурлыг хийж байгаа юм. Бизнес эрхлэгчдийг авлигаас ангид, хууль дүрэм журмын хүрээнд ёс зүйтэй бизнес эрхлэхэд тус зөвлөл нь Бизнесийн Ёс зүйн төвтэйгөө хамтраад сургалт арга зүйгээр хангах, мэдлэг мэдээлэл түгээх, соён гэгээрүүлэх үйл ажиллагааг цаашид илүү шинэ шатанд гаргаж ажиллах зорилт тавьж, үүнд манай зөвлөлд нэгдэж байгаа гишүүн компаниуд болон мэргэжлийн хуульчид маань идэвхи санаачлагатай ажиллана гэж найдаж байна. Ингээд зөвлөлд нэгдэж буй ААН-дээ талархал илэрхийлье” гэлээ.
Тус хуралд танхимын дэргэдэх Бизнесийн ёс зүйн төвийн менежер Г.Дэмчигням өнгөрсөн жилүүдэд соён гэгээрүүлэх чиглэлээр хийсэн ажлаа танилцууллаа.
Улмаар хурлын төгсгөлд зөвлөлийн даргаар Юнител группын Эрсдлийн удирдлага, комплаенс хариуцсан газрын захирал Л.Пагамсүрэнг гишүүдийн олонхын саналаар сонгож баталлаа.