Литва улстай олон салбарт хамтран ажиллах боломж бий
МҮХАҮТ-ын Ерөнхийлөгч Д.Энхтүвшин Бүгд Найрамдах Литва улсаас Монгол Улсад хавсран суугаа Элчин сайд эрхэмсэг ноён Ричардас Шлепавичиус, бусад төлөөлөгчийг хүлээн авч уулзсан. Уулзалтын үеэр Элчин сайд Литва улсын эдийн засаг, бизнесийн салбарын талаар дэлгэрэнгүй танилцуулга хийж хоёр улсын хамтын ажиллагааны талаар хоёр тал санал солилцов.
Европын Холбооны орнуудын зах зээлд нэвтрэх бас нэг гарц хэмээн тодорхойлогдож буй Литва улсын Элчин сайд “Глобал шийдлийг хамтран эрэлхийлэхэд Литва улс нээлттэй” гэв. Литва улс газар нутгийн хэмжээгээр манай улсаас хэд дахин жижиг ч хүн амын хувьд тун ойролцоо буюу 2.8 сая иргэнтэй. Өнгөрсөн жилийн дүнгээр тус улсын нэг хүнд ногдох ДНБ 25 мянган евро байна. Түүнчлэн дотоодын зах зээл төдийлөн том биш учир гадны түнш, хөрөнгө оруулалтын боломжуудыг онцолдогоо Элчин сайд эрхэмсэг ноён Ричардас Шлепавичиус МҮХАҮТ-д зочлохдоо ярьж, илтгэл танилцуулсан юм.
Тэрбээр танилцуулгадаа Литва улс бизнес эрхлэлтийн индексээр эхний 11-т, ашгийн татвар багатай орнуудын 3-т ордог тухай дурдаад “Сүүлийн 20 жилийн хугацаанд Литва улс Европын орнуудаас нэг хүнд ногдох бодит ДНБ-ээрээ хамгийн хурдацтай хөгжиж буй эдийн засаг” гэлээ. Элчин сайд эрхэмсэг ноён Ричардас Шлепавичиус Ливта улс бизнесийн салбарт хамтран ажиллах боломжуудаас гадна боловсрол, шинжлэх ухааны салбарт хоёр улс хооронд түншлэх гарц бий хэмээсэн юм. Тодруулбал, хүн амынх нь 57 хувь нь дээд боловсрол эзэмшсэн, залуу мэргэжилтнүүдийн 85 хувь нь Англи хэлний өндөр мэдлэгтэй байдгаас гадна нийт хүн амын 76 хувь нэг болон үүнээс дээш хэлний мэдлэгтэй аж. Ингээд боловсролын чиглэлээр тус улсад гадны иргэдийн суралцдаг чиглүүдийг дэлгэрэнгүй танилцуулсан.
Литва улс гадаадын шууд хөрөнгө оруулалтыг дэмжихэд ихээхэн анхаардаг бөгөөд FDI-тай төслүүдийн 20 хувийг АНУ, 13 хувийн Их Британи эзэлж байгаа бол сүүлийн 10 жилийн хугацаанд үйлдвэрлэлээс гадна IT салбар хөрөнгө оруулалтыг ихээхэн татаж байгааг тус улсын Элчин сайд онцоллоо. Ийм ч учраас тус улс IT, ICT гэсэн “ухаалаг салбар”-т чиглэсэн бодлогуудыг хэрэгжүүлж эхэлжээ. Тодруулбал, зөвхөн сүүлийн хоёр жилд Литва улс 260 сая гаруй еврог инновацийг дэмжих системүүдийг хөгжүүлэхэд зарцуулсан бол старт ап хөгжүүлэх эко системийг (инкубатор, хурдасгуур болох хөтөлбөрүүд гэх мэт) бий болгоход 100 сая гаруй евро төсөвлөөд байна.
МҮХАҮТ-ын Ерөнхийлөгч Д.Энхтүвшин Бүгд Найрамдах Литва улстай эдийн засаг, худалдааны олон салбарт хамтран ажиллах боломж байгааг дурдаад цаашид хоёр улсын бизнес форум, бизнесийн салбарын төлөөллүүдийн уулзалтыг Литва улсад зохион байгуулах боломжтой гэдгийг мэдэгдлээ.
Литва улс Монгол Улсад газрын тос, химийн бүтээгдэхүүн ихэвчлэн нийлүүлдэг бол манай улс ноос, ноолууран бараа, бүтээгдэхүүн тус улсад экспортолж байна.