Silk Road шагналыг гардууллаа
Бүгд Найрамдах Австри улсын иргэн Эвалд Жосеф Еркер “Баян трейвэл лодж” ГХОХХК-ийг үүсгэн байгуулж 2019 оноос Монгол Улсын аялал жуулчлалын салбарт хөрөнгө оруулалт хийж, эко стандартыг тогтоож, салбарын хөгжилд түлхэц болж байгааг өндөрөөр үнэлэн Silk Road шагналыг МҮХАҮТ-ын Гүйцэтгэх захирал Т.Дүүрэн түүнд гардууллаа.
“Баян трейвэл лодж” компани нь Төв аймгийн Эрдэнэ сум, Баяндавааны ард, Баруун шохойн ам хэмээх байгалийн үзэсгэлэн бүрдсэн газарт байрлах “Баян Монгол Ресорт” эко амралтын газрын үйл ажиллагааг амжилттай эрхлэн явуулж байна. Уг ресорт нь байгаль орчинд ээлтэй, ногоон хөгжлийн бодлогыг нэн тэргүүнд хэрэгжүүлэхийг эрхэм зорилгоо болгож, байгаль орчин, эрүүл ахуйн шаардлага хангасан эко аялал жуулчлалын бүтээгдэхүүн, үйлчилгээг жилийн дөрвөн улирлын турш амрагч, жуулчдад үзүүлэн ажиллаж байна. Үүний хүрээнд ресортын цахилгаан эрчим хүчийг өөрийн хөрөнгөөр барьсан цахилгаан дамжуулах агаарын шугам, дэд өртөө болон сэргээгдэх эрчим хүч болох нарны зайн цахилгаан станцаар бүрэн шийдвэрлэж, зуны улиралд ресортын амрагчдын байр, рестораны барилга байгууламжийн цахилгаан эрчим хүчийг дан ганц сэргээгдэх эрчим хүчээр бүрэн хангажээ. Түүнчлэн үйл ажиллагаандаа “Чанарын менежментийн тогтолцоо ISO 9001:2015 /MNS ISO 9001:2016/”, “Байгаль орчны менежментийн тогтолцоо ISO 14001:2015 /MNS ISO 14001:2016/”, “Аюулын дүн шинжилгээ ба эгзэгтэй цэгийн хяналтын тогтолцоо CAC/ RCP 39-1993 /MNS CAC RCP39 : 2011/” зэрэг олон улсын стандартыг нэвтрүүлсэн Монголын аялал жуулчлалын салбарын анхдагчдын нэг бөгөөд тэдний бүтээгдэхүүн, үйлчилгээ нь Booking, Expedia, Нotels.com, Аgada, Ostrovok.ru, Trip. зэрэг платформод аль хэдийн албан ёсоор нэвтэрчээ.
Аялал жуулчлал бол нийгмийн цөөнх үр ашгийг нь хүртдэг бус, орон нутгийн иргэд өгөөжийг нь шууд хүртэх боломжтой, экспортын орлого бүрдүүлдэг салбар. Энэ утгаараа Монгол Улсын аялал жуулчлалын салбарт оруулж буй Эвалд Жосеф Еркерийн хөрөнгө оруулалтын үр дүнд 20 гаруй байнгын ажлын байр бий болсон, орон нутгийн малчидаас эко, шинэ мах, сүү, сүүн бүтээгдэхүүний байнгын худалдан авалтыг хийж, өрхийн орлого нэмэгдсэн, тухайн бүс нутгийн иргэд, малчид цахилгаан эрчим хүчээр хангагдсан гэх мэт олон эерэг үр дүн гарсаар байна.
“Баян Монгол Ресорт” нь Монгол Улсын Ерөнхийлөгч У.Хүрэлсүхийн санаачилсан “Тэрбум мод” үндэсний хөтөлбөрийг дэмжин ресортдоо 100 мод тарин арчлан хамгаалж, модны ургалт 80 гаруй хувьтай байна. Мөн аялал жуулчлалын салбарт хэрэгжиж буй “Нэг жуулчин нэг хонь” хөтөлбөрийг идэвхитэй дэмжин ажиллаж байна.