ТОМИЛОЛТ: Баруун бүсийнхэн Ү Жя Чюй хотын удирдлагуудтай хамтын ажиллагааны санамж бичиг байгууллаа
БНХАУ-ын Шинжаан уйгурын Өөртөө засах орны Бүтээн байгуулалтын 6-р дивизийн харьяа Ү Жя Чюй хот болон Монголын баруун бүсийн бизнес эрхлэгчдийн хамтын ажиллагааны уулзалт, форум гурван өдрийн турш амжилттай болж өндөрлөлөө. Энэ сарын 15-нд эхэлсэн ууулзалтад МҮХАҮТ-ын Ерөнхий Нарийн Бичгийн дарга С.Баясгалан болон Ховд, Увс, Баян-Өлгий аймгийн салбар танхимын дарга нар, баруун бүсийн 16 компанийн 40 орчим бизнес эрхлэгчид оролцож, өөрсдийн бизнесээ танилцуулж, туршлага судлах, бүс нутгийн хамтын ажиллагааг сайжруулах, Хятадын талтай бодит хамтын ажиллагааны боломжуудын талаар хэлэлцсэн юм.
Мөн тус хотноо энэ сарын 16нд "Шинжааны Ү Жя Чюй хотын бизнес форум" боллоо. Форумд манай бизнес эрхлэгчдээс гадна Хятад талаас 400 гаруй иргэн, бизнес эрхлэгчид оролцсон юм. Харин уулзалт, форумын гурав дахь өдөр баримт бичигт гарын үсэг зурж, гэрээ хэлцлүүд байгууллаа. Тухайлбал, Ховд Ү Жя Чюй хотын хооронд ах дүү хотын гэрээнд гарын үсэг зурлаа. Мөн МҮХАҮТ болон Ү Жя Чюй хот, Ү Жя Чюй хотын дарга болон МҮХАҮТ-ын Ховд аймаг дахь салбар танхимын дарга Б.Ганзориг нар хамтын ажиллагааны санамж бичигт гарын үсэг зурав.