Хүний нөөцийн ажилтнууд Хөгжлийн бэрхшээлтэй иргэдийн талаар зөв хандлага, ойлголттой болох нөлөөллийн семинарт хамрагдаж байна
Монгол Улс дахь хөгжлийн бэрхшээлтэй иргэдийн хөдөлмөр эрхлэлтийг дэмжих тогтолцоог бэхжүүлэх төслийг багаас аж ахуй нэгж, байгууллагуудад зориулсан 21 дэх удаагийн нөлөөллийн семинарыг МҮХАҮТ-д өнөөдөр /2024.10.23/ зохион байгуулж байна. Семинарыг нээж МҮХАҮТ-ын дэд дарга Ц.Магнайбаатар, төслийн ахлах зөвлөх Чиба Хисао нар үг хэллээ.
Нөлөөллийн семинарын гол зорилго нь хөгжлийн бэрхшээлтэй иргэдийн хөдөлмөр эрхлэлт хариуцсан ажилтан, хүний нөөцийн мэргэжилтнүүд нь хөгжлийн бэрхшээлтэй иргэдийн хөдөлмөр эрхлэлтийн ач холбогдол, ажиллуулах арга барил, бодит жишээнд суралцсанаар өөрийн байгууллагын үйл ажиллагаанд тусган, тухайн иргэдийн хөдөлмөр эрхлэлтийг дэмжин ажиллах юм.
Сургалт семинарт “Таван богд” интернейшнл, “Мэргэн номин” ХХК, “Номин” Холдинг, “MCS-Coca Cola”, “Гурван гал” ХХК, “Кашмер Холдингс” ХХК, “Арөбайт Инлёг” ХХК, “Major Supply” ХХК зэрэг компани, аж ахуй нэгжүүдийн хөгжлийн бэрхшээлтэй иргэдийн хөдөлмөр эрхлэлт хариуцсан ажилтан, хүний нөөцийн мэргэжилтнүүд бүртгүүлэн, оролцож байна.
ЖАЙКА олон улсын байгууллага, ГБХНХЯ-ны хамтран хэрэгжүүлж буй "Хөгжлийн бэрхшээлтэй иргэдийн хөдөлмөр эрхлэлтийг дэмжих тогтолцоог бэхжүүлэх уг төсөл (DPUB2)" нь Хөгжлийн бэрхшээлтэй иргэд (ХБИ)-ийн хөдөлмөр эрхлэлтэд дэмжлэг үзүүлэх хүний нөөц болох ажлын байрны дадлагажуулагчийг бэлтгэдэг. Ажлын байрны дадлагажуулагч нь ААНБ болон ХБИ-ийн хооронд "Гүүр" холбоосын үүрэг гүйцэтгэж, ХБИ-ийн тогтвортой хөдөлмөр эрхлэлтэд дэмжлэг үзүүлж ажилладаг.
ААНБ-ууд ХБИ-ийг тогтвортой ажиллуулахын тулд хөгжлийн бэрхшээл, ХБИ-ийн хөдөлмөр эрхлэлтийн талаар зөв хандлага, ойлголттой болж, дэмжлэг үзүүлэх зохистой арга (ажлын байрны тохируулга), ажлын байрны орчныг сайжруулах, харилцах аргуудад суралцах нь чухал юм. Япон зэрэг өндөр хөгжилтэй орнуудад ХБИ-ийн хөдөлмөр эрхлэлтийг дэмжиж, ХБИ-ийг хэрэглэгч талаас нь хандсанаар ААНБ-уудын борлуулалт, бүтээмж дээшилсэн тохиолдол олон байдаг юм байна.