“НҮБ75” санаачилгад МҮХАҮТ хувийн хэвшлийн оролцоог хангахаар нэгдлээ
НҮБ байгуулагдсаны 75 жилийн ой 2020 онд тохиож байгаатай холбогдуулан НҮБ-ын Ерөнхий нарийн бичгийн дарга “НҮБ-75” хэмээх санаачилгыг эхлүүлээд байгаа юм. Энэ хүрээнд “Хүсч буй ирээдүйгээ хамтдаа бүтээн байгуулъя” уриан дор дэлхийн өнцөг булан бүрт олон талт хэлэлцүүлгүүд өрнөж, ирэх 25 жилийн дүр зургийг тодорхойлох үйл явц үргэлжилж байна.
Үүнтэй холбогдуулан МҮХАҮТ, НҮБ-ын Монгол дахь Суурин зохицуулагчийн газар хамтран “НҮБ-75 САНААЧИЛГА: 2020 ОН БА ИРЭЭДҮЙ” хувийн хэвшлийн салбарын байгууллагуудын уулзалт, хэлэлцүүлгийг өнөөдөр зохиолоо.
Хэлэлцүүлгийг нээж МҮХАҮТ-ын Ерөнхийлөгч О.Амартүвшин “Дэлхий нийтийг хамарсан цар тахлаас үүдэн бид том сорилттой тулгарч буй энэ цаг үед олон улсын хамтын ажиллагаа, үндэстэн хоорондын нөхөрлөлийн үнэ цэнэ, ач холбогдлыг улам бүр үнэлж, мэдрүүлж байна. Монгол Улс төдийгүй дэлхийн эдийн засагт маш том хүндрэл саад бэрхшээл тулгарч байгаа бөгөөд өнөөдрийн хэлэлцүүлгээр Монголын бизнесийн хувийн хэвшлийнхэн тулгамдаж буй асуудал, түүний гарц шийдэл, гаргасан санал, зөвлөмжүүдээ НҮБ-т шууд хүргүүлэх болно. Бидний дуу хоолой НҮБ-ын ирэх 25 жилийн хөгжлийн хөтөлбөрийн хувийн хэвшлийг дэмжих чиглэлд тодорхой санал болон тусна гэдэгт итгэлтэй байна” гэлээ.
Хэлэлцүүлгээс Монгол дахь суурин төлөөлөгчийн газар болон МҮХАҮТ хамтарсан тайлан гаргаж НҮБ-д болон ААН-үүдэд илгээх юм.