МҮХАҮТ-ын түүхт 60 жилийн ойн баярын хурал эхэллээ
МҮХАҮТ нь 1960 онд Гадаад худалдааны яамны дэргэд байгуулагдаж 12 гишүүн байгууллагатай үйл ажиллагаагаа эхлүүлж байсан бол өнөөдрийн байдлаар нийт 5063 гишүүн байгууллагатай болж цар хүрээгээ өдрөөс өдөрт тэлсээр байна. Энэхүү 60 жилийн ойн баяр нь мянга мянган баялаг бүтээгч, бизнес эрхлэгч, Монгол Улсад татвар төлөгч, эдийн засгийн эргэлтийг бий болгож буй хүн бүрийн баяр юм. Төр, хувийн хэвшилд ажилладаг хэн боловч үр шимийг хүртэж яваа энэ салбарт өнөөдөр 1,1 сая хүн ажиллаж, төсвийн орлогын 80 хувийг бүрдүүлж байна.
МҮХАҮТ-ын Ерөнхийлөгч О.Амартүвшин “Эдийн засгийн өнөөдрийн хүндрэлийг төр, хувийн хэвшил хамтарч байж л даван туулна. Тиймээс итгэлцэл, ойлголцол чухал. Шинэ жараны үүд нээгдэж байна. Монголын бизнесийн орчны түүхийг бичиж ирсэн үе үеийн удирдлага, баг, хамт олон, хувийн хэвшлийнхэн, төр засаг, бид бүхэнтэй хамтран ажиллаж буй бүхий л дотоод, гадаадын байгууллага, гишүүддээ 60 жилийн ойн мэнд хүргэе. Өнөөдрийн хүрсэн ололт, амжилтын эзэд бол хувийн хэвшлийнхэн. Хөдөлмөрийн зах зээлийн хамгийн том ажил олгогч нь баялаг бүтээгчид буюу бизнес эрхлэгчид байна. Улс орны хувьд ачааны хүндийг энэ хүмүүс үүрч яваа. Цаашид гадаад худалдааг дэмжих, хөрөнгө оруулалт татах, уул уурхайн бус экспортыг төрөлжүүлэх, төр, хувийн хэвшлийн хамтын ажиллагааг илүү сайжруулах, Монголын бараа бүтээгдэхүүнийг олон улсад сурталчлан таниулах нь бидний ойрын зорилт” хэмээн онцоллоо.
Монгол Улсын Ерөнхий Сайд У. Хүрэлсүх нэгэн жарны түүхийг үдэж, нэгэн жарны түүхийг хамтдаа бичилцэж буй МҮХАҮТ-ын үе үеийн удирдлагууд, гишүүн байгууллагууд, бизнес эрхлэгчид болон ажилтан албан хаагчдад баяр хүргэж мэндчилгээ дэвшүүллээ.