Приморийн хязгаарын захирагчтай уулзлаа
Монгол Улсаас ОХУ-д суугаа Онц бөгөөд Бүрэн эрхт Элчин сайд Ө.Энхтүвшин, МҮХАҮТ-ын Ерөнхийлөгч О.Амартүвшин нар Приморийн хязгаарын захирагч Олег Кожемякотой (2021.04.26-нд) уулзлаа. Уулзалтад Приморийн Засаг даргын нэгдүгээр орлогч - Засгийн газрын дарга Вера Щербина, тус нутгийн олон улсын хамтын ажиллагааны агентлагийн дарга Алексей Старичков, Элчин зөвлөх бөгөөд Худалдааны төлөөлөгч Д.Хасар, Худалдааны төлөөлөгчийн газрын тэргүүн, Монгол Улсын Худалдааны төлөөлөгч С.Түвшинтөр, МҮХАҮТ-ын Ахлах мэргэжилтэн Д.Адъяасүрэн нар оролцов.
Хязгаарын захирагч Олег Кожемяко Орос, Монгол хоёр улс олон жилийн найрсаг харилцаатай, эдийн засгийн хөгжлийн чиглэлээр үр бүтээлтэй ажиллаж ирснийг уулзалтын эхэнд тодотгоод өнгөрсөн онд ОХУ Монгол Улстай дипломат харилцаа тогтоосны 100 жилийн ойг тэмдэглэсэн. Цаашид найрсаг харилцааны уламжлалыг хадгалах, харилцан ашигтай хамтын ажиллагааны гол чиглэлүүдэд хамтран ажиллахад Приморийн хязгаарын боомт, газарзүйн байршлыг ашиглах боломжтойг онцлон тэмдэглэв.
Мөн Монгол Улс, Приморийн хязгаар хооронд агаарын харилцаа тогтоох нь чухал гээд тогтмол нислэг нь Владивосток болон Улаанбаатарыг холбож, аялал жуулчлалыг хөгжүүлэх чухал ач холбогдолтойг онцолсон юм. ОХУ-ын бизнес эрхлэгчид Монголоос арьс шир, мах, ноолуур нийлүүлэх сонирхолтой. Приморийн хязгаараар дамжуулан аж ахуйн нэгжүүд бүтээгдэхүүнээ борлуулах, бид өөрсдийн зүгээс мод, загас, загасны бүтээгдэхүүнээр хангах боломжтой хэмээлээ.
Монгол Улсаас ОХУ-д суугаа Онц бөгөөд Бүрэн эрхт Элчин сайд Ө.Энхтүвшин Монгол Улс далайн эргийн боомтоор ачаа тээвэрлэх боломжийг онцгойлон сонирхож байгааг тэмдэглээд Приморскийн хязгаарын далайн боомтуудыг тээврийн асуудлаа шийдэх гарц гэж харж байна хэмээн онцлон тэмдэглэв.
Мөн уулзалтын үеэр талууд аялал жуулчлал, соёл, боловсролын салбарт хамтран ажиллах боломжийн талаар ярилцлаа.
