Приморский мужид Монгол Улсын Худалдааны төлөөлөгчийн газар байгуулагдлаа
ОХУ-ын Владивосток хотод байнгын ажиллагаатай Монгол Улсын Худалдааны төлөөлөгчийн газар нээгдлээ. Нээлтийн арга хэмжээнд Монгол Улсаас ОХУ-д суугаа Онц бөгөөд Бүрэн эрхт Элчин сайд Ө.Энхтүвшин, МҮХАҮТ-ын Ерөнхийлөгч О.Амартүвшин, Приморийн мужийн Худалдаа аж үйлдвэрийн танхимуудын холбооны ерөнхийлөгч Борис Владимирович Ступницкий, Монгол Улсаас ОХУ-д суугаа Худалдааны төлөөлөгч С.Түвшинтөр, Приморын хязгаарын Засгийн газрын орлогч даргын үүрэг гүйцэтгэгч В.И. Прокопчук нар оролцож, баяр хүргэн үг хэллээ.
Монгол Улсаас ОХУ-д суугаа Онц бөгөөд Бүрэн эрхт Элчин сайд Ө.Энхтүвшин Худалдааны төлөөлөгчийн газрын үйл ажиллагааг нээж хэлсэн үгэндээ Монгол Улс бараа, бүтээгдэхүүнээ Приморийн бүс нутаг руу, цаашлаад Владивосток боомтоор Ази, Номхон далайн бүс нутгийн орнууд руу гаргах сонирхолтой байгаа бөгөөд хоёр талын хамтын ажиллагааны ирээдүйтэй салбар зөвхөн нүүрсээр хязгаарлагдахгүй, арьс шир зэрэг хөдөө аж ахуйн бүтээгдэхүүнүүд юм. Түүнчлэн бүс нутагт хамтарсан боловсруулах үйлдвэр байгуулах, бүтээгдэхүүнээ Ази, Номхон далайн бүс нутагт экспортлох боломжийг судлах саналтай байгаагаа илэрхийлээд энэ ажилд Худалдааны төлөөлөгчийн газрын үүрэг, оролцоо их гэдгийг тодотголоо.
Мөн өнөөдөр нээлтээ хийж буй Монгол Улсын Худалдааны төлөөлөгчийн газар “Транзит Монгол Улс” болох энэхүү далайцтай зорилтыг бодит ажил хэрэг болгоход тодорхой хувь нэмэр оруулна гэж найдаж байна гэж хэллээ.
Шинээр байгуулагдаж буй Худалдааны төлөөлөгчийн газрын тэргүүн, Монгол Улсын Худалдааны төлөөлөгч С.Түвшинтөр Монгол, Оросын худалдаа, эдийн засгийн харилцааг тэлэх, Ази, Номхон далайн бүс нутаг руу чиглэсэн Монголын экспорт импорт, транзит тээврийн урсгалыг нэмэгдүүлэхэд гүүр болон ажиллах эрмэлзэлтэй байгаагаа илэрхийлэв.
Приморийн мужид байнгын ажиллагаатай худалдааны төлөөлөгчийн газар нээгдсэнээр цаашид хоёр улсын худалдаа, эдийн засгийн хамтын ажиллагаа өргөжих, эрчимжих боломжийг бүрдүүлэх юм.
