Визийн зөвшөөрөл бүрэн цахимжиж, энэ онд 360 гаруй мянган үйлчилгээг цахимаар үзүүлжээ
“Монгол Улсын цагаачлалын салбарын цахим шилжилт” сэдэвт уулзалт, зөвлөгөөнийг МҮХАҮТ, Гадаадын иргэн харьяатын газаар хамтран зохион байгууллаа. Энэ үеэр гадаадын иргэн харьяатын чиглэлээр сүүлийн жилүүдэд хийж буй ажил, шинэчлэл, нэн ялангуяа цахим шилжилтийн чиглэлээр хийгдэж буй ажлуудыг танилцууллаа.
Тухайлбал виз, зөвшөөрлийн үйлчилгээ цахим хэлбэрт шилжсэн. Түүнээс гарч байгаа үр нөлөө, гадаадын иргэдэд хамаарах хууль тогтоомжийн хэрэгжилтийн талаарх мэдээллүүд, тулгамдаж буй асуудал, шийдвэрлэх арга зам сэдвийн хүрээнд илтгэлүүд тавьсан юм.
Энэ үеэр Гадаадын иргэн харьяатын газрын дарга Н.Ууганбаяр хэлэхдээ “Гадаадын иргэнд үзүүлж буй визийн зөвшөөрөл, оршин суух зөвшөөрлийн үйлчилгээ бүрэн цахимжиж, энэ оны байдлаар 360 гаруй мянган үйлчилгээг цахимаар үзүүлээд байна. Ингэснээр цаг хугацаа, орон зайнаас үл хамааран төрийн үйлчилгээ авах боломж бүрдсэн төдийгүй өдөрт биеэр ирж үйлчлүүлдэг иргэдийн тоо буурч, цахимаар хүлээн авах хүсэлтийн тоо нэмэгдсээр байна. 2001 оноос жуулчин, соёл урлаг, спортын арга хэмжээнд оролцох, дамжин өнгөрөх зэрэг дөрвөн төрлийн ангиллын визийг цахимаар олгож эхлээд гурав дахь жилдээ болж байна. Жишээ нь өнгөрсөн 2023 онд 31 мянга гаруй цахим виз олгосон бол энэ оны 11-р сарын байдлаар 76 мянган цахим виз олгосон нь өнгөрсөн оныхоос 2.4 дахин нэмэгдсэн үзүүлэлт юм. Энэ нь Монгол Улсыг зорих гадаад иргэдийн тоо нэмэгдсэнийг харуулж байна.
Мөн Засгийн газрын 2024 оны 107-р тогтоолоор виз олгох журамд өөрчлөлт оруулж, нэмэлтээр 54 ангиллын визийг цахимаар олгох эрхзүйн орчин энэ оны хавар бүрдсэн. Энэ ажлыг ХЗДХЯ болон Гадаад харилцааны яамны дэмжлэг, Азийн хөгжлийн банкнаас санхүүжүүлж буй эдийн засгийн хамтын ажиллагааны бүс хөгжүүлэх төслийн санхүүжилтээр бодит ажил хэрэг болгон сарын өмнөөс бүх 54 ангиллын визийг цахимаар олгож эхлээд байна” гэлээ.
ГХЯ-ны Консулын газрын захирал Б.Болд мөн нээлтэд оролцож үг хэлэв. Тэрбээр “Монгол Улсад визийн бодлогыг тодорхойлж хэрэгжүүлдэг хоёр газар байдаг. ГХЯ, Гадаадын иргэн харьяатын газар. Энэ ч үүднээсээ олон жилийн турш нягт харилцаатай хамтран ажиллаж, олон чухал ажил хийж хэрэгжүүлж ирсэн. Тухайлбал, Монгол Улсын Засгийн газраас аялал жуулчлалыг дэмжих хүрээнд 2023-2025 оны Монголд зочлох жил болгон зарласантай холбоотойгоор Монгол Улсад аялал жуулчлалын зорилгоор 30 хоногийн хугацаатай ирдэг гадаадын 34 улсын иргэдийг визийн шаардлагаас чөлөөлөх шийдвэрийг манай хоёр байгууллага хамтран судалж гаргасан. Үүний үр дүнд 2022 онд 290 мянга орчим гадны жуулчин манай улсад ирж байсан нь 2023 онд 590 мянга, энэ оны эхний арван сарын байдлаар 600 мянга орчим болж нэмэгдээд байна” гэлээ.
МҮХАҮТ-ын Ерөнхий нарийн бичгийн дарга С.Баясгалан “Монгол Улс цахим засаглалыг бэхжүүлэх чиглэлд сүүлийн жилүүдэд идэвхитэй ажилласан. Энэ үйл ажиллагаа олон улсын хэмжээнд үнэлэгдэж, Монгол Улс цахим засаглалынхаа үзүүлэлтээр дэлхийн 193 улсаас 46-р байрт орсон үзүүлэлт, үнэлгээ 2024 онд гарсан байна. Хоёр жилийн өмнөхтэй харьцуулахад 28 байр дээшилсэн. Олон улсын мэргэжилтнүүд үүнийг үр дүнтэй байна гэж дүгнэж, бүс нутгийн болон олон улсын хэмжээнд цахим засаглалаараа тодорхой бодит ажлууд хийж байгаа улсуудын нэг гэж үнэлгээ өгсөн байна. Цахим засаглал шилжилтийг үр дүнд хүргэхэд олон улсын донор байгууллагуудын оролцоо маш чухал. Монгол Улсад хийж байгаа маш олон төслүүдийг Азийн хөгжлийн банк санхүүжүүлж дэмжиж ирсэн юм.” гэлээ.
Харин Азийн хөгжийн банкны бүс нутгийн хамтын ажиллагаа хариуцсан мэргэжилтэн Д.Өнөржаргал виз цахимжуулах үйл ажиллагаанд гар бие оролцсондоо маш их таатай байгаагаа илэрхийлээд “Азийн хөгжлийн банкнаас Засгийн газрын Шинэ сэргэлтийн бодлого, тэр дундаа боомтын сэргэлт, төрийн бүтээмжийг сайжруулах чиглэлээр нэлээд олон арга хэмжээ хэрэгжүүлж явж байна. Үүний төлөөлөл болж Азийн хөгжлийн банкнаас мөн долоон хилийн боомтыг өргөтгөх шинэчлэх ажлыг санхүүлжүүлж, хөрөнгө оруулж байна. Энэ бол манайхаас хэрэгжүүлж байгаа худалдаа, бизнес эрхлэх, тээврийн үйл ажиллагааг хялбаршуулах гэсэн том арга хэмжээний хүрээнд хийгдэж байгаа нэг ажил” хэмээсэн юм.
