ТОЙМ: МҮХАҮТ энэ долоо хоногт хэрхэн ажиллав
МҮХАҮТ-аас энэ долоо хоногт ямар ажил хийв. Тоймлон хүргэж байна.
Жил бүрийн аравдугаар сарын 1-нд тэмдэглэдэг Олон улсын Ахмадын өдрийг Монгол Улс 33 дахь жилдээ тэмдэглэх гэж байна. Энэ өдрийг угтаж МҮХАҮТ гавьяаны амралтандаа суусан ахмад ажилтнуудаа урьж, хүндэтгэл үзүүллээ.
Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Социалист Вьетнам Улсын Ерөнхийлөгч бөгөөд Коммунист Намын Ерөнхий нарийн бичгийн дарга То Лам Монгол Улсад төрийн айлчлал хийлээ.. Айлчлалын хүрээнд ирсэн зочид төлөөлөгч нар Вьетнам улстай хамтын ажиллагаатай мөн хамтарч ажиллах Монголын бизнесийн төлөөллүүдтэй уулзалт зохион байгуулсан бөгөөд, МҮХАҮТ-ын төлөөлөл болон холбогдох аж ахуй нэгжүүд тус уулзалтад оролцож, цаашдын хамтын ажиллагааны тухай ярилцлаа.
“Зөвшөөрлийн тухай хуулиар олгож буй тусгай болон энгийн зөвшөөрөл шинээр авах, сунгуулахад тулгарч буй асуудал, шийдэл" сэдэвт салбарчилсан уулзалт хэлэлцүүлгийн эхнийх өнөөдөр болж өндөрлөлөө. Энэхүү хэлэлцүүлэгт УИХ-ын гишүүн Х.Ганхуяг (Зөвшөөрлийн тухай хуулийн хэрэгжилттэй танилцаж, холбогдох санал, дүгнэлт гаргаж хуулийн төсөл боловсруулах ажлын хэсгийн ахлагч) ажлын хэсгийн гишүүдийн хамт оролцлоо.
Өнөөдрийн хэлэлцүүлэгт Эрчим хүч, Байгаль орчин, Барилга, хот байгуулалт, нийтийн аж ахуй, Зам тээврийн салбарын төлөөллүүд ирж, тулгамдаж буй асуудлаа ярилцаж, саналаа хэлсэн юм.
“Монгол Улсын цагаачлалын салбарын цахим шилжилт” сэдэвт уулзалт, зөвлөгөөнийг МҮХАҮТ, Гадаадын иргэн харьяатын газаар хамтран зохион байгууллаа. Энэ үеэр гадаадын иргэн харьяатын чиглэлээр сүүлийн жилүүдэд хийж буй ажил, шинэчлэл, нэн ялангуяа цахим шилжилтийн чиглэлээр хийгдэж буй ажлуудыг танилцууллаа.
Тухайлбал виз, зөвшөөрлийн үйлчилгээ цахим хэлбэрт шилжсэн. Түүнээс гарч байгаа үр нөлөө, гадаадын иргэдэд хамаарах хууль тогтоомжийн хэрэгжилтийн талаарх мэдээллүүд, тулгамдаж буй асуудал, шийдвэрлэх арга зам сэдвийн хүрээнд илтгэлүүд тавьсан юм.
"ХААН" банк санаачлан, Санхүүгийн зохицуулах хороо, МҮХАҮТ, Монголын тогтвортой санхүүжилтийн холбоо болон НҮБ-ын Хүүхдийн сан зэрэг байгууллагаас хамтран зохион байгуулж буй “Тогтвортой ирээдүй ба хамтын нөлөө” арга хэмжээ боллоо. Энэ үеэр дэлхий даяар онцлон ярьж буй тогтвортой хөгжил, ногоон санхүүжилт, хүүхдийн хөгжил ба бүтээмж зэрэг сэдвийг ярилцсан юм. Тогтвортой хөгжилд улс төр, бизнес, хувь хүн бүр хэрхэн яаж хувь нэмрээ оруулж болох талаар, тэр дундаа тогтвортой санхүүжилтээр дамжин, тогтвортой хөгжлийн биелэлтүүдийг хурдасгах боломжуудын талаар хэлэлцлээ.
МҮХАҮТ болон НҮБ-ын хүүхдийн сан хооронд харилцан ойлголцлын санамж бичиг байгууллаа. Тодруулбал дараах дөрвөн зорилтын хүрээнд хамтран ажиллахаар тохиролцов.
Монгол Улс дахь Солонгосын Худалдаа Аж Үйлдвэрлэлийн Танхимаас “Хөдөө аж ахуйн гаралтай хүнсний бүтээгдэхүүний үзэсгэлэн”-г МҮХАҮТ-ын нэг давхрын Их танхимд өнөөдөр нээлээ. 2017 оноос хойш жил бүр уламжлал болгон зохион байгуулж ирсэн энэхүү үзэсгэлэн энэ сарын 4-6-ны хооронд гурав хоног үргэлжилнэ. Тус үзэсгэлэн худалдаанд БНСУ-аас 20 гаруй компани оролцож буй бөгөөд зарим нь Монгол дахь гэрээт борлуулагчаа хайж, түншийн гэрээ хэлэлцээр хийхээр зорьж ирсэн байна.