"Монгол-Казахстаны хамтарсан ажил хэргийн зөвлөл"-ийн анхдугаар хуралдаан боллоо

Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Казахстан Улсын Ерөнхийлөгч Касым-Жомарт Кемелевич Токаев 2024 оны 10 дугаар сарын 28-29-ний өдрүүдэд Монгол Улсад төрийн айлчлал хийж байна. Энэ хүрээнд өнөөдөр /2024.10.28/ МҮХАҮТ-ын их танхимд "Монгол-Казахстаны хамтарсан ажил хэргийн зөвлөл"-ийн анхдугаар хуралдаан боллоо.

 Хуралдаанаар хоёр улсын бизнес эрхлэгчдийн худалдаа, эдийн засгийн болон хөрөнгө оруулалтын хамтын ажиллагааг гүнзгийрүүлэх, өргөжүүлэх яриа хэлэлцээрүүд хийж, санамж бичигт гарын үсэг зурлаа. Казахстан талаас хөдөө аж ахуй, хүнс, гадаад худалдаа, хөнгөн үйлдвэрлэл зэрэг салбарын 10 гаруй компани бизнесийн олон талт хамтын ажиллагаагаа өргөжүүлэхээр Монголын ААН-үүдтэй В2В уулзалт зохион байгуулахаар хүрэлцэн иржээ.

Өнөөдрийн хуралдааны зорилго нь Монгол, Казахстаны хоорондын хамтын ажиллагааг өргөжүүлж, шинэ боломжуудыг нээх явдал юм. Хоёр орны бизнесийн харилцаа нь арвин их боломжийг агуулж байгаа бөгөөд энэ хуралдаанаар түүнийгээ гүнзгийрүүлж, хамтран ажиллах чиглэлээ тодорхойлох юм.

Анхдугаар хуралдааныг нээж Бүгд Найрамдах Казахстан Улсын Цахим хөгжлийн сайд Мадиев Ж. Х хэлэхдээ “Казахстан улс цахим засаглалаараа дэлхийд 24-р байр эзэлж байна. Бид Төв Азийн хамгийн том техникийн төв “Astana Hub” байгуулсан. Энд бүх төрлийн бүтээгдэхүүний өргөн хүрээний үйlчилгээ үзүүлдэг. 436 орны компаниудын 1500 гаруй байнгын оролцогч байна. Гол зорилго нь бизнес эрхлэгч, стартапуудын технологийн, Төв Азийн зах зээлд оруулах юм. Монгол Улсад өөрсдийн туршлагаа судлуулж, IT, цахим технологийг хөгжүүлэхэд нь хамтарч ажиллаж болно. Монголын стартапуудыг дээрх системд оруулж, сургалтад хамруулахыг хүсэж байна. Хоёр улсын зах зээлийн онцлогийг илүү ойлгож, инноваци технологийг нэвтрүүлэх боломж бий” гэв.

МҮХАҮТ-ын гүйцэтгэх захирал Т.Дүүрэн “Сүүлийн жилүүдэд бидний хоёр улсын хоорондын худалдаа, хөрөнгө оруулалт, бизнесийн харилцаа өсөн нэмэгдэж байгааг тэмдэглэх нь зүйтэй. Монгол, Казакстан улс хоорондын худалдааны нийт эргэлт 2019 онд 35.3 сая доллар байсан бол 2023 онд 76.7 сая доллар болж 117 хувиар нэмэгдсэн дүнтэй байна. Энэ нь бидний стратегийн түншлэлийн үр дүн бөгөөд ирээдүйд илүү их амжилт гаргах боломжийг бидэнд олгож байна.

Цаашид МҮХАҮТ-ын зүгээс эдийн засгийн хамтын ажиллагааг улам өргөжүүлэх, худалдааны тэнцлийг хангах, хоёр улсын хамтарсан төсөл хөтөлбөрүүдийг хэрэгжүүлэх, хөрөнгө оруулалтыг нэмэгдүүлэх, худалдааг хөнгөвчлөх, тээвэр логистикийн асуудлуудыг шийдвэрлэх чиглэлээр нягт хамтран ажиллах болно. Монгол улс, Казахстан хоорондын логистикийн боломжуудыг нээх нь хоёр улсын эдийн засагт үр ашигтай. Монгол, Казахстан хоорондын тээвэрлэлтийн шинэ маршрутуудыг бий болгох нь хоёр улсын географийн байрлал болон авто зам, төмөр замын сүлжээг ашиглан богино хугацаанд тээвэрлэх боломжтой. Логистикийн төвүүдийг байгууснаар энэ нь бараа бүтээгдэхүүнийг хурдан хугацаанд хадгалах, ялгах, тээвэрлэх боломжийг нэмэгдүүлнэ” гэлээ.

Мөн Казахстаны Гадаад худалдааны танхимын дарга Каримсаков М. Р. Казахстан улсын Ерөнхийлөгч Монгол Улсад айлчлах үеэр хамтын ажиллагаагаа эхлүүлж байгаа нь манай хоёр орны эдийн засгийг хөгжүүлэх том боломж нээгдэж байгааг онцлоод “Казахстаны үндэсний танхим аж ахуй нэгжүүдийн эрхийг төрийн байгуулага, олон улсын байгууллага болон гадаадад төлөөлж, хамгаалдаг. Бид гадаадын хөрөнгө оруулалт, нээлттэй хаалганы бодлого баримталж, татварын тогтвортой, урьдчилан таамаглахуйц тогтолцоог хангаж, шүүхийн тогтолцоог боловсронгуй болгож, бизнесийн шударга орчин бүрдүүлж байна. Бид Бүгд найрамдах Казахстан Улсын Засгийн газартай хамтран гадаад хөрөнгө оруулалтыг татах, тэдэнтэй харилцах зорилгоор Үндэсний цахим хөрөнгө оруулалтын платформ боловсруулсан. Энэ нь аж ахуй нэгжүүдэд хөрөнгө оруулагчдыг татах, бизнесийг хөгжүүлэх, гадаад түншүүдээ олоход тусалдаг. Энэ оны есдүгээр сарын 13-нд Казахстан Монголын бизнесийн зөвлөлийг цахим хэлбэрээр байгуулсан нь манай хоёр орны харилцааны чухал үе шат болсон юм. Хоёр орны бизнес эрхлэгчид харилцан ажиллах боломжийг нээж, хоёр орны эдийн засгийн хамтын ажиллагааг албан ёсных болгосон” гэлээ.